Áý basta bir top qaıratker shyǵyp, qylmysyn ózi moıyndap turǵanyna qaramastan, Erlan Biláldi «sútten aq, sýdan taza» dep betin jyrtyp, jylap-syqtady, «daryndy adam para almaıdy» desip eńiresti. Biraq, aqsha kórse akter de joldan taıady eken, daryndylyǵyna qaramastan (shynyn aıtsam, qandaı obraz somdaǵanyn bilmeıdi ekenmin).
Obaly neshik, Erlannyń erligi qateligin ashyq moıyndaýy boldy.
Sot úkimi oqylǵanda, álgi ataqtarynan at úrketin qaıratkerler at-tondaryn ala qashyp qarasyn kórsetpedi.
Olarǵa azamattan góri onyń laýazymy qymbat bolǵan shyǵar. Mánsabynan aıyrylǵany anyq bolǵan soń «ash páleden qash pále». Al, akterimiz ótken iske ókingen de shyǵar, biraq, ataǵy men syılyqtaryna jarmasyp, zar ıledi. Ar-uıattan góri ataq pen syılyq qymbat zaman-aı, deseńshi!
Endi biraz jurt «nebary mıllıon jarym-aq para úshin 52 mln teńge aıyppul salyp aýyr jaza kesti» desip shýlap jatyr. Para men urlyqtyń az-kóbi bolýshy ma edi?!
Qazir bolmashy mánsapqa qol jetkizgenderdiń kóbi para alýǵa, búdjettiń aqshasynan jymqyryp qalýǵa tyrysatyny bárimizge belgili. Bir anyǵy – laýazymdyq qyzmettiń qaı túrin de dál qazir eshkimniń daryn-qabiletine, biliktilik-qarymyna qarap ádil túrde usynyp jatqan joq. Ne bir surqıa alaıaqtar men aqymaqtar da eki tizgin, bir shylbyrdy qolyna alyp, ózderinen neshe ese aqyldy, bilimdi jandarǵa kósemsip otyr.
Jaı kósemsip qana qoımaı biliktililerge ólerdeı óshigip, qysym jasap, tyqsyryp, qýǵyndap jatyr. Erteńgi kúni taǵy bireý urlyq ústinde ustalsa «ol zalym emes, ǵalym edi», «qazaqtyń birtýarynyń qyzy edi», «pálenshekeńmen syılasqan adamnyń uly edi» dep aqtap alýǵa tyrysyp júrmesek boldy ǵoı.
Sebebi, qazir mánsaptylardyń úlkeni de, kishisi de qarpyp qalýǵa, ilip ketýge, jymqyra berýge qatty áýestenip ketken. Qysqasy, ustalmaǵannyń bári ury emes. Sondyqtan, sybaılas jemqorlyqpen kúres agenttiginiń jumysyna atsalysyp, qol ushyn bermesek te, shyn jemqorlarǵa ara túspeı tynysh otyraıyqshy, tym quryǵanda! Zańymyzdy syılap úıreneıik!
Qýandyq Shamahaıuly
Feısbýk paraqshasynan
