Aqtóbe oblysynyń politseileri 70 jastaǵy zeinetkerge alaiaqtar aldap alǵan 9 million teńgeden astam qarajatyn qaitaryp berdi, dep habarlaidy Dalanews.kz.
Polisia.kz málimetinshe, áiel eki ai boiy alaiaqtardyń psihologiialyq qysymyna ushyrap, bar jiǵan-tergen aqshasyn ǵana emes, páterin satyp túsken qarjyny da olarǵa aýdarǵan. Ómir boiy muǵalim bolyp eńbek etken zeinetker tek tamyz aiynyń basynda ǵana aldanyp qalǵanyn túsinip, politsiiaǵa júgingen.
Tergeý barysynda onyń 20 jyl boiy jinaǵan 9 million teńge jinaǵyn alǵash bolyp aýdarǵany belgili boldy. Keiin páterin satqannan túsken qarajatty da solarǵa jibergen. Aqsha maýsym jáne shilde ailarynyń sońynda taksi qyzmeti arqyly jetkizilgen.
Alaiaqtar jábirlenýshini standartty shema arqyly aldaǵan: aldymen onyń telefonyna SMS-habarlama kelgen, artynsha ózin eGov portalynyń qaýipsizdik qyzmeti men ulttyq qaýipsizdik organdarynyń ókili retinde tanystyrǵan adamdar qońyraý shalǵan. Olar áieldiń bank shotyna "shabýyl jasalyp jatqanyn" aityp, qarajatyn "qaýipsiz shotqa" aýdarýdy usynǵan. Keiin onyń shetelde turatyn qyzyna barý úshin páterin satýdy josparlaǵanyn bilgen alaiaqtar satylǵannan túsken aqshany da osylaisha iemdenýge qol jetkizgen.
Jedel izdestirý sharalary barysynda aqshanyń Shymkent qalasyna jiberilgeni anyqtaldy. Politsiianyń arnaiy toby issaparǵa shyǵyp, qarjyny taýyp, tárkiledi. Qarajat zeinetkerge saltanatty túrde qaitaryldy.
"Ómir boiy ustaz bolyp eńbek ettim, ózimdi saýatty adammyn dep oilaitynmyn. Biraq alaiaqtarǵa qalai senip qalǵanymdy túsinbeimin. Eki kúnnen keiin týǵan kúnim — bul sizderden alǵan eń úlken syiym boldy", — dedi kózine jas alǵan áiel politseilerge alǵys bildirip.
Aqtóbe oblysy politsiia departamenti bul oqiǵany kópshilikke kiberalaiaqtardyń arbaýyna túsip qalmaý úshin eskertý retinde jariialaǵanyn atap ótti.
