اقتوبە وبلىسىنىڭ پوليسەيلەرى 70 جاستاعى زەينەتكەرگە الاياقتار الداپ العان 9 ميلليون تەڭگەدەن استام قاراجاتىن قايتارىپ بەردى، دەپ حابارلايدى Dalanews.kz.
Polisia.kz مالىمەتىنشە، ايەل ەكى اي بويى الاياقتاردىڭ پسيحولوگيالىق قىسىمىنا ۇشىراپ، بار جيعان-تەرگەن اقشاسىن عانا ەمەس، پاتەرىن ساتىپ تۇسكەن قارجىنى دا ولارعا اۋدارعان. ءومىر بويى ءمۇعالىم بولىپ ەڭبەك ەتكەن زەينەتكەر تەك تامىز ايىنىڭ باسىندا عانا الدانىپ قالعانىن ءتۇسىنىپ، پوليسياعا جۇگىنگەن.
تەرگەۋ بارىسىندا ونىڭ 20 جىل بويى جيناعان 9 ميلليون تەڭگە جيناعىن العاش بولىپ اۋدارعانى بەلگىلى بولدى. كەيىن پاتەرىن ساتقاننان تۇسكەن قاراجاتتى دا سولارعا جىبەرگەن. اقشا ماۋسىم جانە شىلدە ايلارىنىڭ سوڭىندا تاكسي قىزمەتى ارقىلى جەتكىزىلگەن.
الاياقتار جابىرلەنۋشىنى ستاندارتتى سحەما ارقىلى الداعان: الدىمەن ونىڭ تەلەفونىنا SMS-حابارلاما كەلگەن، ارتىنشا ءوزىن eGov پورتالىنىڭ قاۋىپسىزدىك قىزمەتى مەن ۇلتتىق قاۋىپسىزدىك ورگاندارىنىڭ وكىلى رەتىندە تانىستىرعان ادامدار قوڭىراۋ شالعان. ولار ايەلدىڭ بانك شوتىنا "شابۋىل جاسالىپ جاتقانىن" ايتىپ، قاراجاتىن "ءقاۋىپسىز شوتقا" اۋدارۋدى ۇسىنعان. كەيىن ونىڭ شەتەلدە تۇراتىن قىزىنا بارۋ ءۇشىن پاتەرىن ساتۋدى جوسپارلاعانىن بىلگەن الاياقتار ساتىلعاننان تۇسكەن اقشانى دا وسىلايشا يەمدەنۋگە قول جەتكىزگەن.
جەدەل ىزدەستىرۋ شارالارى بارىسىندا اقشانىڭ شىمكەنت قالاسىنا جىبەرىلگەنى انىقتالدى. پوليسيانىڭ ارنايى توبى ءىسساپارعا شىعىپ، قارجىنى تاۋىپ، تاركىلەدى. قاراجات زەينەتكەرگە سالتاناتتى تۇردە قايتارىلدى.
"ءومىر بويى ۇستاز بولىپ ەڭبەك ەتتىم، ءوزىمدى ساۋاتتى اداممىن دەپ ويلايتىنمىن. ءبىراق الاياقتارعا قالاي سەنىپ قالعانىمدى تۇسىنبەيمىن. ەكى كۇننەن كەيىن تۋعان كۇنىم — بۇل سىزدەردەن العان ەڭ ۇلكەن سىيىم بولدى"، — دەدى كوزىنە جاس العان ايەل پوليسەيلەرگە العىس ءبىلدىرىپ.
اقتوبە وبلىسى پوليسيا دەپارتامەنتى بۇل وقيعانى كوپشىلىككە كيبەرالاياقتاردىڭ ارباۋىنا ءتۇسىپ قالماۋ ءۇشىن ەسكەرتۋ رەتىندە جاريالاعانىن اتاپ ءوتتى.
