Aqtóbe oblysynda «Mansap» ortalyqtary arqyly jańa mamandyqty igerip jatqan azamattar qatary artyp keledi.
Aqtóbe qalasyndaǵy «Mansap» ortalyǵynyń mamany Raiymgúl Qojantaevanyń aitýynsha, biyl jumyssyz retinde tirkelgen 120 adam túrli mamandyq boiynsha kýrstarda oqyp, jumysqa ornalasady.
– Eńbek naryǵyn damytýdyń 2024-2029 jyldarǵa arnalǵan tujyrymdamasy aiasynda bastalǵan jobanyń maqsaty – jumyssyzdardy jumyspen qamtyp, olardyń bilimin shyńdaý. Kýrsqa qabyldaý 23 sáýirde bastaldy. Búginde shashtaraz kýrsynda – 10, pishýshi kýrsynda – 12, tiginshilik kýrsynda 9 adam oqyp jatyr. Budan bólek aldaǵy ýaqytta jumyssyzdarǵa konditer, aspaz, slesar-santehnik kýrstary oqytylady. Munda yntaly qatysýshylar teoriialyq bilim alyp, úirengenin tájiribe júzinde pysyqtaidy. Kýrsty aiaqtaǵansha bilim alýshylarǵa 43574 teńge kóleminde shákirtaqy tólenedi. Byltyr 160 adam eńbek naryǵynda suranysqa ie mamandyqtardy igerip shyqty. Onyń 141-i jumysqa ornalasyp, 39 adam óz erkimen, ártúrli sebeppen oqýdy jalǵastyrýdan bas tartqan.
Jumyssyz qala turǵyndaryn Nekrasov kóshesi, 112 mekenjaiynda ornalasqan jumyspen qamtý ortalyǵynda kútemiz. Munda jumyssyzdarǵa keńes berilip, olar mamandyǵyna qarai kýrs oqýǵa baǵyttalady, – deidi ol.
Oqytý bolashaq jumys oryndarynda ótedi. Bolashaq jumys berýshilerdiń biri – «Eset batyr» turǵyn alabyndaǵy sulýlyq salonynyń iesi Mádina Jalǵasbaeva. Onyń salonynda ashylǵan «Beautymania» oqý ortalyǵynda 10 jumyssyz áiel shashtaraz mamandyǵy boiynsha bilim alady.
Kýrsta oqyp jatqandardyń biri Gaýhar Musaeva ekinshi ai boiy erlerdiń shash qiiý tehnologiiasyn oqyp, meńgerýge talpynýda. Ol kúieýimen birge alty bala tárbielep otyr.
– 13 sáýirde «Mansap» ortalyǵyna jumyssyz retinde tirkeldim. Qazir bilikti mamandardan shash qiiýdyń túrli ádisterin úirenip jatyrmyn. Bir qýantarlyǵy, kýrsty oqyp bitirgennen keiin sán salonynda bir jyl kóleminde eńbek ete alamyz. Adamdar únemi shashtaryn qiyp, ózderine kútim jasap júredi. Sondyqtan suranys árqashan bolady, iaǵni ózimdi de, otbasymdy da qamtamasyz etýge múmkindik bar degen sóz, – deidi jas kelinshek.
Aita ketý kerek, mansap ortalyǵy kýrs oqityndarǵa tólenetin shákirtaqydan bólek jumys berýshige de ai saiyn oqý qunyn tóleidi. Onyń mólsherin óńirlik komissiia belgileidi. Oqýdy aiaqtaǵan jumyssyzdy keminde 12 ai merzimge turaqty jumysqa ornalastyrý - jobaǵa qatysýǵa niet bildirgen jumys berýshiler úshin mindetti talap bolyp tabylady.
