Aqtóbede Bókenbai batyr kóshesindegi jańadan ashylǵan «Anvar» gipermarketi aldynda referendýmdy qoldaýǵa arnalǵan jastar festivali uiymdastyryldy. Ashyq aspan astynda ótken merekelik kesh qala turǵyndaryna saiasi naýqandy aqparattyq-túsindirý formatynda jalǵasty, dep habarlaidy Dalanews.kz.
Is-sharany qala jastary uiymdastyrǵan. Sahnada oqý oryndarynyń bilim alýshylary men óner ujymdary óner kórsetti. Jinalǵan qaýymǵa oblystyq koalitsiia músheleri Jańa Konstitýtsiia jobasynyń negizgi baǵyttaryn túsindirip, 15 naýryzda ótetin respýblikalyq referendýmǵa belsendi qatysýǵa shaqyrdy.
Oblystyq máslihat depýtaty Aigúl Nurkeeva referendýmdy tarihi kezeń dep atap ótti. Onyń aitýynsha, Konstitýtsiia – memlekettiń tiregi ári bolashaq urpaqtyń taǵdyryna áser etetin basty qujat.
«Biz búgin tarihi kezeńniń kýási bolyp turmyz. Konstitýtsiia — memleketimizdiń tiregi, bolashaq urpaqtyń taǵdyryna tikelei áser etetin basty qujat. Qabyldanatyn ózgerister ádiletti, progressivti Qazaqstandy qalyptastyrýǵa baǵyttalǵan. Barshańyzdy referendýmǵa kelip, daýys berýge shaqyramyn. Bolashaǵymyz úshin birge sheshim qabyldaiyq!», — dedi oblystyq máslihat depýpaty Aigúl Nurkeeva.
«Jastar rýhy» jastar qanaty oblystyq filialynyń tóraǵasy Álisher Tynyshtyq eldegi turaqtylyq pen reformalardyń nátijesine toqtaldy.
«Bul ózgerister — Prezident Qasym-Jomart Toqaevtyń ádiletti qoǵam qurýǵa jáne jastardy qoldaýǵa baǵyttalǵan saiasatynyń nátijesi. Jańa Konstitýtsiia — jai qujat emes, bilimge, ǵylymǵa jáne innovatsiiaǵa ashylǵan keń jol. Bul — ár jasqa berilgen naqty múmkindik. Referendým — «Men elimmen birgemin!» dep aitatyn sheshýshi sát. 15 naýryz — ár adam daýys berý arqyly el tarihyn aiqyndaityn kún. Biz tańdaý jasaimyz jáne bolashaqty birge quramyz!», — dedi ol.
Sondai-aq «Anvar» saýda jelisiniń direktory Aslan Qaiyrǵaliev te óz pikirin bildirdi. Ol jańa jobada azamattardyń quqyqtary men bostandyqtary, eńbek quqyqtary konstitýtsiialyq deńgeide bekitiletinin alǵa tartty.
Qalamyzda irgeli nysandardyń boi kóterýi Prezidenttiń kásipkerlikti qoldaý saiasatynyń tikelei jemisi dep aita alamyn. Ár adamnyń quqyǵy men bostandyqtary memlekettiń basty basymdyǵy retinde bekitilip otyr. Ár adam sapaly eńbekpen, ózi qalaǵan kásip túrimen ainalysýǵa quqyly. Eldik múdde men jarqyn bolashaq úshin barsha aqtóbelikti jańa Konstitýtsiiany qoldaýǵa shaqyramyn! Elimiz aman, kásibimiz berekeli bolsyn!», — dedi Aslan Qaiyrǵaliev.
Aita keteiik, respýblikalyq referendým 15 naýryzda ótedi.
