Aqtóbede sottalýshylar túrmeden qashyp ketken. Osy is boiynsha jaýapty qyzmetkerler sottaldy, - dep habarlaidy Dalanews.kz.
Aqtóbe qalasynyń №2 sotymen "S", "I" jáne "N" salǵyrttyq, iaǵni memlekettik fýnktsiialardy oryndaýǵa ýákilettik berilgen adamnyń óz mindetterin qyzmetine adal qaramaýy nemese uqypsyz qaraýy saldarynan oryndamaýy nemese tiisinshe oryndamaýy degen aiyppen qylmystyq is qaraldy (QK-niń 371-babynyń 1 bóligi).
Qysqasha fabýla
11 qarasha 2023 jyly Aqtóbe qalasy Politsiia basqarmasynyń Ýaqytsha ustaý izoliatoryna táýliktik kezekshilikke kezekshisi "S", beket kúzetshisi "N", alyp shyǵýshy "I" taǵaiyndalǵan.
2023 jyly 12 qazanda saǵat 01:34 - 05:58 aralyǵynda "S", "N" jáne "I" qyzmet atqarý ornynda uiyqtap qalýlaryna bailanysty tergeýmen qamaýda otyrǵan "E" men "K" saǵat 03:36-da tergeýmen anyqtalmaǵan zatpen kamera esigin ashyp, eshbir kedergisiz izoliatordan shyǵyp, kire beristegi esiktiń magnittik qulyptyń symdaryn úzý arqyly syrtqa shyǵyp bostandyqqa qashyp ketken.
Sońǵylardy izdestirý jumystaryna Aqtóbe oblysy politsiia departamentiniń, politsiia basqarmasynyń, qalalyq jáne aýdandyq politsiia bólimsheleriniń qyzmetkerleri jáne Qazaqstan Respýblikasy Ulttyq ulany 6655 áskeri bóliminiń áskeri qyzmetkerleri jumyldyrylyp, qamaýdan qashqandar 4-saǵattyń ishinde ustalyp, izoliatorǵa jetkizildi.
Sóitip, "S", "I" jáne "N" salǵyrttyq, iaǵni laýazymdy adamnyń óz mindetterin tiisinshe oryndamai, qyzmetine adal qaramaýy nemese uqypsyz qaraýy saldarynan qoǵamnyń jáne memlekettiń zańmen qorǵalatyn múddelerine eleýli ziian keltirýge ákep soqqan qylmystyq quqyq buzýshylyqty jasaǵan.
Sottalýshylardyń ustanymy
Sottalýshylar "N" jáne "I" kinásin moiyndady, al "S" kinásin moiyndamady.
Memlekettik aiyptaýshynyń pikiri
Memlekettik aiyptaýshy sottan árqaisysyna 1 jyl merzimge bas bostandyǵynan shekteý jazasyn taǵaiyndaýdy surady.
Sottyń sheshimi
Qylmystyq jaýaptylyqty jáne jazany jeńildetetin mán-jailar retinde sot sottalýshylar "I" jáne "N" qylmys jasaǵandaryna shyn nietpen ókinýi, "I" asyraýynda tórt kámelet jasyna tolmaǵan balalary baryn eskeredi. QK-tiń 54-babynyń 1-bóliginiń 13)-tarmaǵyna sáikes "S", "I" jáne "N" bergen kásibi antyn buza otyryp, qylmystyq quqyq buzýshylyq jasaǵandyǵy qylmystyq jaýaptylyq pen jazany aýyrlatatyn mán-jaiy bolyp tabylady.
Sot úkimimen "S", "I" jáne "N" árqaisysyna 1 jyl bas bostandyǵynan shekteý jazasy taǵaiyndaldy. Aqtóbe oblysy politsiia Departamentin tiisti shara qoldaný úshin sotpen jekeshe qaýly shyǵaryldy. Sot úkimi zańdy kúshine engen joq.
