Aqtóbe qalasynyń №2 soty júzýden eńbek sińirgen bapker Azamat Sarbasovqa qatysty úkim shyǵardy. Ol alaiaqtyq jasady dep tanyldy, dep habarlaidy Dalanews.kz.
Kznews.kz málimetinshe, ótken jyldyń kúzinde jáne biyl kóktemde Aqtóbe joǵary sport sheberligi mektebiniń bapkeri shákirtterimen birge Shymkentte oqý-jattyǵý jiyndaryna barǵany týraly qujat rásimdelgen. Raport negizinde issapar shyǵyndaryna alǵashynda 1,5 mln teńge, keiin 1,9 mln teńge bólingen.
Sarbasov Shymkentten oralǵan soń býhgalteriiaǵa barlyq qujattardy, sonyń ishinde poiyz biletteri men otyrǵyzý talondaryn tapsyrǵan.
Alaida keiingi tekseris barysynda Ishki memlekettik aýdit departamenti bapkerdiń eki jaǵdaida da shákirtterimen birge jiynǵa barmaǵanyn anyqtady. Ol bólingen qarajatty óz qajetine jumsaǵan. Jiynnan habarsyz bolǵanyn sportshylardyń ózderi de rastaǵan.
56 jastaǵy bapker sotta kinásin moiyndady. Isti qaraǵan sot ony alaiaqtyq jasaǵany úshin aiypty dep tanydy.
Sarbasov 3 jyl 6 aiǵa bostandyǵyn shekteý jazasyna kesildi. Alaida Konstitýtsiianyń 30 jyldyǵyna bailanysty jariialanǵan amnistiiaǵa sáikes jaza merzimi 2 jyl 4 aiǵa qysqardy. Sonymen qatar ol Jábirlenýshilerge ótemaqy qoryna 78,6 myń teńge tóleýge mindetteldi.
Sot sheshimimen oǵan aldaǵy 6 jyl boiy memlekettik organdarda, sonyń ishinde sport mektepterinde jumys isteýge tyiym salyndy.
