اقتوبە قالاسىنىڭ №2 سوتى جۇزۋدەن ەڭبەك سىڭىرگەن باپكەر ازامات سارباسوۆقا قاتىستى ۇكىم شىعاردى. ول الاياقتىق جاسادى دەپ تانىلدى، دەپ حابارلايدى Dalanews.kz.

Kznews.kz مالىمەتىنشە، وتكەن جىلدىڭ كۇزىندە جانە بيىل كوكتەمدە اقتوبە جوعارى سپورت شەبەرلىگى مەكتەبىنىڭ باپكەرى شاكىرتتەرىمەن بىرگە شىمكەنتتە وقۋ-جاتتىعۋ جيىندارىنا بارعانى تۋرالى قۇجات راسىمدەلگەن. راپورت نەگىزىندە ءىسساپار شىعىندارىنا العاشىندا 1،5 ملن تەڭگە، كەيىن 1،9 ملن تەڭگە بولىنگەن.

سارباسوۆ شىمكەنتتەن ورالعان سوڭ بۋحگالتەرياعا بارلىق قۇجاتتاردى، سونىڭ ىشىندە پويىز بيلەتتەرى مەن وتىرعىزۋ تالوندارىن تاپسىرعان.

الايدا كەيىنگى تەكسەرىس بارىسىندا ىشكى مەملەكەتتىك اۋديت دەپارتامەنتى باپكەردىڭ ەكى جاعدايدا دا شاكىرتتەرىمەن بىرگە جيىنعا بارماعانىن انىقتادى. ول بولىنگەن قاراجاتتى ءوز قاجەتىنە جۇمساعان. جيىننان حابارسىز بولعانىن سپورتشىلاردىڭ وزدەرى دە راستاعان.

56 جاستاعى باپكەر سوتتا كىناسىن مويىندادى. ءىستى قاراعان سوت ونى الاياقتىق جاساعانى ءۇشىن ايىپتى دەپ تانىدى.

سارباسوۆ 3 جىل 6 ايعا بوستاندىعىن شەكتەۋ جازاسىنا كەسىلدى. الايدا كونستيتۋسيانىڭ 30 جىلدىعىنا بايلانىستى جاريالانعان امنيستياعا سايكەس جازا مەرزىمى 2 جىل 4 ايعا قىسقاردى. سونىمەن قاتار ول جابىرلەنۋشىلەرگە وتەماقى قورىنا 78،6 مىڭ تەڭگە تولەۋگە مىندەتتەلدى.

سوت شەشىمىمەن وعان الداعى 6 جىل بويى مەملەكەتتىك ورگانداردا، سونىڭ ىشىندە سپورت مەكتەپتەرىندە جۇمىس ىستەۋگە تىيىم سالىندى.