Aqtóbe qalasynyń jol qaýipsizdigin qamtamasyz etý jáne tsifrlyq tehnologiialar ortalyǵynyń direktory 8 jylǵa bas bostandyǵynan aiyrylýy múmkin. Oǵan «Senip tapsyrylǵan bóten múlikti iemdenip alý nemese talan-tarajǵa salý» baby boiynsha aiyp taǵyldy, dep habarlaidy Dalanews.kz "Kazinform"-ǵa silteme jasap.
№ 2 Aqtóbe qalalyq sotynda Aqtóbe qalasynyń jol qaýipsizdigin qamtamasyz etý jáne tsifrlyq tehnologiialar ortalyǵynyń direktory Abzal Tilmaǵambetovke qatysty istiń jaryssózi ótti. Oǵan Qylmystyq kodekstiń «Senip tapsyrylǵan bóten múlikti iemdenip alý nemese talan-tarajǵa salý» baby boiynsha aiyp taǵylyp, memlekettik aiyptaýshy 272 mln teńgeniń jumysy atqarylmaǵanyn habarlady.
Is materialyna súiensek, 2022 jyldyń sońynda Abzal Tilmaǵambetov jol belgilerine qarjy suraidy. 2023 jyldyń qańtar aiynda Aqtóbe qalalyq máslihatynyń sheshimimen ortalyqqa 221 mln teńgeden astam qarjy aýdarylady.
Keiin Memlekettik satyp alý konkýrsy ótkiziledi. Konkýrs talaby boiynsha kóshe ataýlary men sany, atqarý merzimi jazylýy tiis. Alaida bul talaptar saqtalmai, konkýrs jeńimpazy anyqtalady. Keiin ol aiyptalýshy A.Kýsýmovpen sóz bailasady. Aiyptalýshy A.Kýsýmov 2020 jyly kompiýter men kofe apparattaryn jóndeý qyzmetin kórsetetin jeke kásipker retinde tirkelgen.
"2023 jyldyń sáýiri men jeltoqsan aiy aralyǵynda Abzal Tilmaǵambetov jalpy somasy 272 mln teńge shyǵyn keltirdi. Qylmystyq kodekstiń «Senip tapsyrylǵan bóten múlikti iemdenip alý nemese talan-tarajǵa salý» baby boiynsha qylmys jasady. Jaýap berý kezinde Abzal Tilmagambetov óz kinásin moiyndamady. Abzal Tilmagambetovti aiypty dep tanyp, 8 jyl bas bostandyǵynan aiyrý jazasyn taǵaiyndaýdy suraimyz. A. Kýsýmovty Qylmystyq kodekstiń «Senip tapsyrylǵan bóten múlikti iemdenip alý nemese talan-tarajǵa salý» baby boiynsha 8 jylǵa bas bostandyǵynan aiyrý jazasy suralady", - dedi memlekettik aiyptaýshy.
Kelesi aptada sottalýshylar sotta sońǵy sózin aitady.
Eske salaiyq, qańtar aiynda Aqtóbe qalalyq prokýratýrasy «Aqtóbe qalasynyń jol qaýipsizdigin qamtamasyz etý jáne tsifrlyq tehnologiialar ortalyǵy» KMM direktory biýdjet qarajatyn jymqyrǵanyn anyqtaǵan bolatyn.
