Aqtóbede er adam óz anasyn aiaýsyz uryp-soǵyp, qabyrǵasyn syndyrǵan. Alaida jábirlenýshi ulyn keshirgennen keiin sot oǵan 400 saǵat qoǵamdyq jumys jazasyn taǵaiyndady, dep habarlaidy Dalanews.kz "Diapazon" basylymyna silteme jasap.
Oqiǵa osydan birneshe ai buryn, qys mezgilinde bolǵan. Is boiynsha sot úkimi jaqynda ǵana shyqqan.
Aiyptaý derekterine súiensek, 35 jastaǵy er adam mas kúide ári esirtki áserinde úiine kelgen. Sol kezde ol anasyn qurbysymen birge spirttik ishimdik iship otyrǵanyn kórip, janjal shyǵarǵan. Aldymen qonaq áieldiń betinen eki ret judyryqpen uryp, dastarhandy aýdaryp tastaǵan.
Anasyn qorǵaýǵa umtylǵan áielge de shabýyl jasaǵan. Er adam áýeli anasyn betinen uryp, keiin jerge qulatyp, qabyrǵasyna soqqy jasaǵan. Sońynda ony kóterip, tunshyqtyrmaq bolǵan. Áiel tunshyǵa bastaǵan kezde ulyn toqtatýǵa tyrysqan.
Jábirlenýshiler syrtqa shyǵyp, politsiiaǵa habarlasýǵa tyrysqan. Alaida er adam olardyń sońynan shyǵyp, “102”-ge habarlasqandaryn baiqap, anasynan úige qaitýyn talap etken.
Sot-meditsinalyq saraptama nátijesinde áieldiń eki qabyrǵasy synǵany anyqtaldy.
Aiyptalýshy Qylmystyq kodekstiń densaýlyqqa qasaqana ortasha aýyrlyqtaǵy ziian keltirý baby boiynsha sottalǵan. Ol óz kinásin tolyq moiyndap, áreketin anasyn ishimdik ishkeni úshin jasaǵanyn aitqan. Degenmen ózi de sol sátte mas kúide bolǵan.
Sot barysynda jábirlenýshi bolǵan oqiǵany egjei-tegjeili baiandap, keiin ulyn keshirgenin aityp, qylmystyq isti toqtatýdy suraǵan.
Sot sheshimimen er adam 400 saǵat qoǵamdyq jumysqa tartyldy. Úkim jariialanǵannan keiin ol qamaýdan bosatyldy. Buǵan deiin aiyptalýshy eki ai tergeý izoliatorynda bolǵan.
