Aqtóbe oblysynyń mamandandyrylǵan aýdanaralyq ekonomikalyq soty 5,5 mlrd teńgeden asatyn iri múliktik daýǵa qatysty isti qaraýdy aiaqtady, dep habarlaidy dalanews.kz.
Joǵarǵy sot málimetinshe, daý eki aktsionerlik qoǵam arasyndaǵy tabiǵi gaz jetkizý shartyna bailanysty týyndaǵan. Shart boiynsha 2026 jylǵy qańtardan mamyrǵa deiin bir kompaniia ekinshisine 5 mlrd teńgeden astam somaǵa tabiǵi gaz jetkizgen.
Alaida jetkizilgen gaz úshin tólem jasalmaǵan. Osyǵan bailanysty jetkizýshi kompaniia sotqa júginip, jinaqtalǵan bereshekti óndirip berýdi talap etken.
Isti sot talqylaýyna daiyndaý barysynda taraptarǵa daýdy sottan tys retteýdiń artyqshylyqtary túsindirilip, mediatsiia rásimin júrgizýge járdem kórsetilgen.
Nátijesinde jaýapker kompaniia qaryzynyń bar ekenin moiyndaǵan.
Sot bekitken mediativtik kelisimge sáikes, boryshker 5,5 mlrd teńgeden astam bereshekti kelisilgen tólem kestesi boiynsha 2026 jylǵy qazan aiyna deiin óteýge mindettendi.
Sonymen qatar taraptar tabiǵi gazdyń aǵymdaǵy tutynylýyna aqy tóleý tártibin kelisken. Olar ózara esep aiyrysýlardy ai saiyn salystyryp tekserýge jáne qabyldanǵan mindettemelerdiń oryndalýyn qamtamasyz etetin tetikti bekitýge ýaǵdalasqan.
Mediativtik kelisim sotpen bekitilgennen keiin is boiynsha is júrgizý toqtatyldy. Talap qoiýshyǵa buryn tólegen 86,5 mln teńge mólsherindegi memlekettik baj qaitaryldy.
Sottyń málimetinshe, taraptardyń mediatsiia arqyly kelisimge kelýi kóp milliard teńgelik daýdy qysqa merzimde sheshýge, qosymsha sot shyǵyndaryn boldyrmaýǵa jáne mindettemelerdi oryndaýdyń naqty merzimderi men tártibin belgileýge múmkindik bergen.
