OKQ alańynda ótken baspasóz konferentsiiasy barysynda Aqtóbe oblysynyń ákimi Ashat Shaharov óńir turǵyndarynyń ómir sapasyn jaqsartýǵa baǵyttalǵan bilim berý jáne densaýlyq saqtaý salalaryndaǵy jobalardyń júzege asyrylýy týraly aitty, dep habarlaidy Dalanews.kz.
Biyl «Keleshek mektepteri» ulttyq jobasy aiasynda 5 jańa mektep paidalanýǵa berildi, taǵy bir mektep Úkimet rezervi esebinen salyndy.
«Keleshek mektepteri» oblys ortalyǵyndaǵy «Altyn Orda» yqshamaýdanynda – 2000 oryndyq, «Baýyrlastar-3» – 600 oryndyq, «Saiajai-1» jáne «Sazdy» turǵyn alaptarynda – 300 oryndyq mektepter halyq igiligine berildi. Sonymen qatar, Mártók aýdanynyń Saryjar aýylynda 300 oryndyq mektep esigin aiqara ashty.
Jyl sońyna deiin jalpy 5800 orynǵa arnalǵan taǵy 7 jaily mekteptiń qurylysyn aiaqtap, paidalanýǵa berý josparlanýda. Onyń 4-eýi – Aqtóbe qalasynda, 3-eýi – aýyldarda boi kóterip jatyr.
Budan bólek, biyl Ashysai, Jazyq jáne Oiyl aýyldarynda taǵy úsh jańa mektepti, Aqtóbe qalasyndaǵy №8 orta mektep pen arnaiy mektepke qosymsha qurylystardy, sondai-aq Mártók, Embi jáne Qarakól aýyldaryndaǵy mektepterge qosymsha sport zaldaryn paidalanýǵa berý josparlanǵan.
«Aýyldyq densaýlyq saqtaýdy jańǵyrtý» ulttyq jobasy aiasynda óńirde josparlanǵan 29 nysannyń 22-si iske qosyldy. Bul shamamen 13 myń aýyl turǵynyn meditsinalyq qyzmetpen qamtýǵa múmkindik berdi.
«Jyl sońyna deiin taǵy 7 nysannyń qurylysyn aiaqtaý josparlanyp otyr. Sonyń nátijesinde 4 myńnan astam adam sapaly meditsinalyq qyzmetke qol jetkizedi. Jańa meditsinalyq pýnkter men ambýlatoriialar Yrǵyz, Qobda, Muǵaljar jáne Shalqar aýdandarynyń aýyldarynda ashylady», – dedi Ashat Shaharov.
Densaýlyq saqtaý salasyn tsifrlandyrýǵa erekshe nazar aýdarylýda. Biyl Kópsalaly oblystyq aýrýhana bazasynda telemeditsina men PACS aqparattyq júiesin qamtityn Ahýaldyq ortalyq jumysyn bastady.
Telemeditsina zamanaýi tehnologiialardy paidalana otyryp, onlain-konsýltatsiialar júrgizýge múmkindik beredi, bul shalǵai aýyldar úshin asa mańyzdy. PACS júiesi KT, MRT jáne rentgen zertteýleriniń nátijelerin jasandy intellekt kómegimen óńdeýge jáne taldaýǵa jaǵdai jasaidy.
«Sonymen qatar Aqtóbe óńiri elde alǵashqylardyń biri bolyp «Iandeks.Kartalar» platformasy arqyly jedel járdem kólikteriniń qozǵalysyn naqty ýaqyt rejiminde monitoringteý jobasyn iske asyrdy. Qazirgi ýaqytta 60 jedel járdem kóligi GPS-navigatsiia júiesimen jabdyqtalǵan, bul jedel qyzmettiń jumys tiimdiligi men áreket etý jyldamdyǵyn arttyrady», – dep atap ótti Ashat Shaharov.
