Aqtóbe oblysynyń Oiyl aýdany kóktemde bolǵan sý tasqynynan qatty zardap shekti. Tabiǵi apattan keiin úiler men joldar qirap, aýqymdy qalpyna keltirý jumystary qolǵa alynǵan edi. Alaida osy jumystar barysynda jergilikti sheneýniktiń sybailas jemqorlyq áreketi anyqtaldy, dep habarlaidy Dalanews.kz.
“Diapazon” málimetinshe, Oiyl aýdandyq sáýlet, qurylys, turǵyn úi-kommýnaldyq sharýashylyq jáne avtomobil joldary bóliminiń burynǵy basshysy Ainat Qazmaǵambetovke para aldy degen aiyp taǵylyp, isi sotqa jiberildi. 42 jastaǵy sheneýnik qyzmetine biylǵy 11 naýryzda kirisip, bir ai ótpei jatyp, alǵashqy zańbuzýshylyqqa barǵan.
Tergeý derekterine sáikes, Qazmaǵambetov sáýir jáne tamyz ailarynda eki merdiger kompaniianyń basshylarynan para alǵan. Atalǵan kompaniialar sý tasqyny saldarynan qiraǵan aýyldardy qalpyna keltirý boiynsha kelisimshart jasasqan. Birinshi jaǵdaiynda ol 100 myń teńge, al ekinshi ret 500 myń teńge para alǵany anyqtaldy.
Kinásin tolyq moiyndaǵan sheneýnik prokýratýramen kelisimge keldi. 15 qarashada Aqtóbe qalalyq soty Qazmaǵambetovke 21 million teńge aiyppul salyp, ony memlekettik qyzmetten ómir boiyna shettetý týraly úkim shyǵardy.
Para bergen merdiger kompaniia direktory da jazadan qutylǵan joq. Oǵan 10 million teńge aiyppul salynyp, memlekettik qyzmetke aralasýǵa tyiym salyndy. Sot úkimi áli zańdy kúshine engen joq.
