Aqtóbe oblysynda «Keleshek mektepteri» ulttyq jobasy aiasynda 22 800 orynǵa arnalǵan 14 mekteptiń qurylysy júrgizilýde,- dep habarlaidy Dalanews.kz
Búgingi kúni jalpy syiymdylyǵy 2300 oryn bolatyn eki mektep paidalanýǵa berildi. Onyń biri – jobalyq qýattylyǵy 300 oryndyq Aqjar-2 turǵyn alabyndaǵy №79 mektep, ekinshisi – 1868 oqýshy oqityn, 2000 orynǵa arnalǵan «Eset batyr» turǵyn alabynyń №3 shaǵyn aýdanyndaǵy mektep.
«Keleshek mektepteri» jobasynyń negizgi maqsaty – oqýshy oryndarynyń tapshylyǵyn, apatty jaǵdaidaǵy mektepter men úsh aýysymdy oqytý máselesin joiý, sondai-aq sapaly bilim alýǵa zamanaýi, qaýipsiz jáne qolaily jaǵdai jasaý. Barlyq jańa mektepter jańartylǵan formatta salynyp, tolyqtai qazirgi talaptarǵa sáikes jabdyqtalady: oqý kabinetteri interaktivti quraldarmen, zerthanalarmen, kitaphanalarmen, STEM-zonalarymen jáne jańa úlgidegi pán kabinetterimen qamtylady. Erekshe nazar inkliýziiaǵa aýdarylyp, erekshe bilim berý qajettilikteri bar balalarǵa da jaǵdai jasalady. Sonymen birge beinebaqylaý, kúzet, kirýdi baqylaý júieleri jáne órt qaýipsizdigimen qamtamasyz etý sharalary qarastyrylǵan.
Búgin Aqtóbe oblysynda «Keleshek mektepteri» ulttyq jobasy aiasynda salynǵan alǵashqy mektepte ashyq esik kúni ótti. Bul – Aqjar-2 turǵyn alabynda ornalasqan, 300 orynǵa arnalǵan №79 orta mektep. Bolashaq birinshi synyp oqýshylary oqý kabinetterin, sport jáne akt zaldaryn, kitaphana men ashanany aralap, ózderiniń bolashaq ustazdarymen kezdesti. Balalarǵa arnalǵan oiyn baǵdarlamasy uiymdastyrylyp, olardyń jańa mektep ortasyna beiimdelýine jáne aldaǵy oqý jylyna alǵashqy áser alýyna múmkindik jasaldy.
Jańa oqý jylynyń basyna deiin óńirde taǵy bes mektepti ashý josparlanyp otyr, olardyń úsheýi Aqtóbe qalasynda ornalasqan. Tórt mektep «Keleshek mektepteri» ulttyq jobasy aiasynda boi kóterýde. Olar: 2000 oryndyq «Altyn Orda-2» shaǵyn aýdanyndaǵy mektep (№63 jáne №64 mektepterdiń júktemesin azaitady), 600 oryndyq «Baýyrlastar-3» turǵyn alabyndaǵy mektep, 300 oryndyq «Saiajai-1» turǵyn alabyndaǵy mektep (Zarechnyi eldi mekenindegi úsh mekteptiń júktemesin jeńildetedi) jáne Mártók aýdanynyń Saryjar aýylyndaǵy 300 oryndyq mektep.
Qazirgi ýaqytta taǵy segiz mekteptiń qurylysy júrip jatyr. Olardyń qatarynda Aqtóbe qalasynyń «Eset batyr» №7 shaǵyn aýdanyndaǵy 2000 oryndyq, «Altyn Orda-2» turǵyn alabyndaǵy, «Batys-2» turǵyn alabyndaǵy 900 oryndyq, «Sazdy» turǵyn alabyndaǵy 300 oryndyq, «Janaqonys-2» turǵyn alabyndaǵy 600 oryndyq jáne «Ońtústik-Batys-2» turǵyn alabyndaǵy 300 oryndyq mektepter bar. Sondai-aq Muǵaljar aýdanynyń Qandyaǵash qalasynda 600 oryndyq, Temir aýdanynyń Shubarqudyq aýylynda 600 oryndyq jáne Kenkiiak aýylynda 600 oryndyq mektepterdiń qurylysy júrgizilýde.
Jobanyń júzege asyrylýy úsh aýysymdy oqytýdy aitarlyqtai qysqartýǵa, apatty mektepterdi joiýǵa jáne óńirdegi oqýshylarǵa sapaly bilim alýǵa zamanaýi ári qaýipsiz jaǵdai jasaýǵa múmkindik beredi.
