Ázerbaijan áýe joldarynyń (AZAL) J28243 reisimen Bakýden Groznyiǵa ushyp bara jatyp, Qazaqstannyń Aqtaý qalasy mańynda apatqa ushyraǵan ushaq jolaýshysy bolǵan oqiǵa týraly aityp berdi, - dep habarlaidy Dalanews.kz "Anadolý" agenttigine silteme jasap.
Sýbhonkýl Rahimov AZAL ushaǵynyń apatqa deiingi oqiǵalary men ekipajdyń jolaýshylarǵa qalai kómekteskeni týraly aityp berdi.
Tájikstan týmasy sońǵy 24 jylda Reseide turyp, sol jaqtyń azamattyǵyn alǵan.
"Men sol kezde múlgip otyrǵan edim, keiin ushaq biik kóterile bastaǵandai sezildi. Kózimdi ashsam, tuman kórdim. Astyńǵy jaǵynda tuman, eshteńe kórinbeidi. Sonda men ushaq ekinshi ainalymǵa baryp, qaita qonatyn shyǵar dep oiladym", – deidi Rahimov.
Ushqyshtyń manevrlerinen ol ushaq ekinshi ret qonaiyn dep jatyr dep túsingen.
"Bul meniń boljamym ǵana. Groznyi qalasy sol mańda boldy ma, naqty aita almaimyn, óitkeni ony kórmedim. Tek boljam ǵana aita alamyn", – dep túsindirdi ol.
Rahimovtyń aitýynsha, jarylystan keiin birden keibir ottegi maskalary tústi. Ol ushaq qaptamasynyń zaqymdalǵanyn da baiqaǵan. Ushaq qatty shaiqaldy, sodan keiin ushaq biiktei bastaǵan. Sodan keiin ushaq teńselip, tómengi biiktikte turaqtap ushýdy jalǵastyrǵan.
"Birshama ýaqyt ótkennen keiin teńiz kórindi, aýa raiy da ashyla bastady. Sol kezde ushaq birtúrli, baqylaýsyz qalǵan siiaqty bolyp kórindi", – deidi ol.
Onyń aitýynsha, jarylystan keiin ushaq basqarýǵa kelmei qalǵandai bolyp, "qaltaqtap, shaiqala" bastaǵan.
Jolaýshylar osy sátte qatty qorqyp, bul olardyń ómirindegi sońǵy sátter bolýy múmkin ekenin sezine bastaǵan. Rahimovtyń ózi duǵa oqyp, kresloda otyryp namaz oqyǵan.
Er adam ushaq qulaǵannan keiin esin joǵaltpaǵanyn, birneshe ret artqa ushyp ketkenin jáne basymen soqqy alǵanyn aitady.
"Kóz aldymda ot, sarǵylt jalyn kórdim. Keiin… bári birneshe sekýnd ishinde boldy. Sodan keiin tynyshtyq ornady. Typ-tynysh. Men tiri qalǵanyma qatty tańǵaldym", – dep eske alady Rahimov.
Onyń aitýynsha, ushaq jerge soǵylǵannan keiin quiryq bóligi alysqa ushyp ketken. Ózi 39-oryndyqta, ushaqtyń quiryq jaǵynda otyrǵan.
Ol ushaq bortseriginiń batyldyǵyna erekshe tańdanǵanyn aitty. Bortserik sońyna deiin óz mindetterin oryndap, jolaýshylarmen sóilesip, olardy tynyshtandyrýǵa tyrysty.
"Ol ózin keremet ustady. Jazbamda onyń daýysy bar, alańdaýly daýysy. Ol ázerbaijan tilinde sóilep, adamdardy tynyshtandyryp jatty. Ol bárin nusqaýlyqqa sai jasady, sońyna deiin. Sol stiýardessa sońǵy sátke deiin jolaýshylarmen sóilesip turdy", – dedi Rahimov.
Apattan birneshe minýt ótken soń, Rahimov qaýipsizdik beldigin sheship shyqqan.Tiri qalǵan bortserikter jaralanǵan, al bir stiýard ilinip qalyp, áreń sóilegen.
"Men olarǵa: "Munda tez ashylatyn qosalqy esik bar ma, sony kórsetińiz?" dedim. Olar abdyrap, es jiia almai, maǵan jaýap bermedi", – deidi ol.
Eki áiel oryndyqtarynda qysylyp qalǵan, Rahimov olarǵa kómektespek bolǵan, biraq qolynan kelmegen. Sol kezde jedel járdem kóligi kelip jetti.
Sondai-aq, ol Qazaqstanǵa apattan zardap shekken jolaýshylarǵa der kezinde kómek kórsetip, aýrýhanada vitse-ministrdiń kelgeni úshin alǵysyn bildirdi.
