Vitse-premer Qanat Bozymbaev IKAO-nyń Eýropalyq jáne Soltústik Atlantikalyq biýrosynyń direktory Nikolia Rallomen kezdesti, dep habarlaidy Dalanews.kz.
Qanat Bozymbaev IKAO-ǵa Qazaqstanmen yntymaqtastyq máseleleri boiynsha turaqty qoldaý kórsetkeni úshin rizashylyǵyn bildirdi. Sondai-aq táýelsiz sarapshy Tormodýr Tormodssondy Azerbaijan Airlines ushaǵy apatqa ushyraǵan jerge ýaqtyly jibergeni úshin alǵysyn aitty.
«Bizge kórsetken turaqty qoldaýyńyzǵa, sonyń ishinde bastamalarymyzdy qoldaǵanyńyz úshin Úkimet atynan shyn júrekten alǵysymdy bildiremin. Osy tergeýdi tolyq aiaqtaý maqsatynda biz IKAO-men ózara is-qimyldy jalǵastyramyz», — dedi Qanat Bozymbaev.
Vitse-premer ushaq apatynyń alǵashqy kúnderinen bastap Qazaqstannyń obektivti jáne jan-jaqty tergeý júrgizýge basymdyq bergenin atap ótti.
Óz kezeginde Nikolia Rallo Qazaqstannyń qysqa merzim ishinde daiyndaǵan jáne jariialaǵan «Azerbaijan Airlines» áýe kompaniiasynyń ushaǵynyń apaty týraly aldyn ala esebin joǵary baǵalady.
«Apattan keiin 1,5 aiǵa jetpes ýaqyt ishinde aldyn ala qorytyndyny aiaqtaýǵa qol jetkizgen Qazaqstan men tergeý komissiiasynyń jumysyn atap ótkim keledi. Men sizdi tergeý barysynda Halyqaralyq azamattyq aviatsiia týraly konventsiiany tolyq oryndaýdy jalǵastyrýǵa shaqyramyn», — dedi Nikolia Rallo.
Esterińizge sala keteiik, Aqtaýdaǵy ushaq apatyn tergeý boiynsha qorytyndy esep Chikago konventsiiasyna sáikes osy jyldyń sońyna deiin jariialanady.
