Aqtaý mańyndaǵy áýe apaty boiynsha esep jaqyn arada jariialanady, dep habarlaidy Dalanews.kz.
Kólik ministri Marat Qarabaevtyń málimdeýinshe, tergeý jumystary aiaqtalýǵa jaqyn.
Aita keteiik, buǵan deiin Premer-ministrdiń orynbasary Qanat Bozymbaev Aqtaýda oryn alǵan áýe apatyna qatysty tergeý jumystary jalǵasyp jatqanyn aitqan edi. Ol halyqaralyq azamattyq aviatsiia uiymynyń (IKAO) talaptaryna sáikes, bir ai ishinde aldyn ala qorytyndy jasalyp, alǵashqy nátijeler jariialanýy tiis ekenin atap ótti. Bul protsess qylmystyq tergeýden bólek júrgizilýde jáne aviatsiialyq bilik organdary apattyń sebepterin anyqtaýǵa baǵyttalǵan.
Apatqa qatysty zertteýlerge sheteldik mamandar da tartylǵan. Qazirgi tańda 17-18 sarapshy jumys istep jatyr, olardyń qatarynda Ázerbaijan, Resei, Braziliia jáne Niderlandtan kelgen mamandar bar. Olar 2024 jylǵy 25 jeltoqsanda Mańǵystaý oblysynda apatqa ushyraǵan Embraer 190 ushaǵynyń qara jáshikterinen alynǵan málimetterdi zertteýde.
“Mamandar ushqyshtardyń dispetcherlermen sóilesýlerin, ushýdyń tehnikalyq parametrlerin jáne ózge de mańyzdy derekterdi taldap jatyr. Bul – aýqymdy ári kúrdeli jumys. Aldaǵy aptada Kólik ministrligi aldyn ala qorytyndylardy jariialaidy dep kútilýde. IKAO standarttaryna sai, aviatsiialyq oqiǵadan keiin 30 kún ishinde bastapqy nátijeler usynylýy qajet. Keibir qiyndyqtar bar, biraq belgilengen merzimge deiin úlgerýimiz kerek”, – dedi Qanat Bozymbaev.
Onyń sózinshe, bul oqiǵa boiynsha Bas prokýratýra jeke qylmystyq is qozǵaǵan, tergeýmen kólik prokýratýrasy ainalysýda.
“Apat saldarynan qaza tapqan azamattardyń otbasylaryna 5 million teńgeden ótemaqy tóleý josparlanǵan. Sonymen qatar jerleý rásimi men marqumdardyń denesin tasymaldaýǵa bailanysty shyǵyndar da óteledi”, – dep málimdedi vitse-premer.
Eske salaiyq, 2024 jyly 25 jeltoqsanda jergilikti ýaqyt boiynsha 11.30-da Aqtaý mańynda Bakýden Groznyiǵa ushyp bara jatqan ushaq apatqa ushyrady. Bul - Azerbaijan Airlines áýekompaniiasyna tiesili Embraer 190 ushaǵy.
Aqparat boiynsha ushaq bortynda 67 adam, onyń ishinde 5 ekipaj múshesi bolǵan.
Apattan 6 qazaqstandyq kóz jumdy. Jalpy qaza tapqandar sany — 38. Qaiǵyly oqiǵadan 29 adam aman qaldy.
Qaiǵyly oqiǵadan keiin Ázerbaijanda Jalpyulttyq aza tutý kúni jariialandy. Túste búkil el boiynsha memlekettik týlar túsirilip, kólikter toqtady. Ázerbaijandyqtar qaza tapqandardy bir minýt únsizdikpen eske aldy.
