Ázirbaıjan prezıdenti Ilham Álıev Aqtaý mańynda apatqa ushyraǵan Azerbaijan Airlines ushaǵyna qatysty qylmystyq isti tereńdetip zertteýdi jáne kinálilerdi jaýapqa tartýdy talap etti, dep habarlaıdy Dalanews.kz.
“Qylmystyq istiń tolyq materıaldaryn jarıalaý áli erte. Aldyn ala tergeý nátıjelerimen tanystym. Bul qaıǵyly oqıǵada Ázerbaıjan azamattarynyń ólimine Reseı Federasıasynyń ókilderi kináli ekenin senimdi túrde aıta alamyn. Ádildikti talap etemiz. Tergeý ashyq ári ádil ótýi kerek”, – dedi ol.
Álıevtiń aıtýynsha, qara jáshikti ashý jumystary júrip jatyr. Ol Reseı Federasıasynyń tergeýdi bastan-aıaq tolyq ashyq júrgizbegenin jáne keıbir faktilerdi jasyrýǵa tyrysqanyn atap ótti.
“Memleketaralyq avıasıa komıtetine qara jáshikterdi ashýǵa ruqsat berer edik, biraq Reseı tarapy oqıǵany qustarǵa nemese basqa sebepterge jabýǵa árekettengennen keıin kúmánimiz kúsheıdi. Bul uıymmen burynnan jumys istep kelsek te, osyndaı jaǵdaılardan keıin tergeý ádildigine kúmán týdyrdy”, – dedi Ázerbaıjan basshysy.
Ilham Álıev jaqyn arada apatqa qatysty aldyn ala málimetterdiń jarıalanatynyna senim bildirip, shyndyqtyń ashylatynyn atap ótti.
“Bul qaıǵyly jaǵdaıdyń barlyq qyryn ashyp, kinálilerdi anyqtaý – bizdiń mindetimiz. Tergeýdiń sońynda shyndyq ornaıtynyna senemin”, – dedi ol.
Aıta keteıik, 2024 jyly 25 jeltoqsanda jergilikti ýaqyt boıynsha 11.30-da Aqtaý mańynda Bakýden Groznyıǵa ushyp bara jatqan ushaq apatqa ushyrady. Bul - Azerbaijan Airlines áýekompanıasyna tıesili Embraer 190 ushaǵy.
Aqparat boıynsha ushaq bortynda 67 adam, onyń ishinde 5 ekıpaj múshesi bolǵan.
Apattan 6 qazaqstandyq kóz jumdy. Jalpy qaza tapqandar sany — 38. Qaıǵyly oqıǵadan 29 adam aman qaldy.
Qaıǵyly oqıǵadan keıin Ázerbaıjanda Jalpyulttyq aza tutý kúni jarıalandy. Túste búkil el boıynsha memlekettik týlar túsirilip, kólikter toqtady. Ázerbaıjandyqtar qaza tapqandardy bir mınýt únsizdikpen eske aldy.
Keıinirek Chıkago konvensıasynyń 13-qosymshasyna sáıkes Qazaqstan Ázerbaıjan men Reseıdiń avıasıalyq organdarymen aqyldasqan soń, QR Kólik mınıstri Marat Qarabaev basqaratyn komısıa Embraer ushaǵynyń qara jáshigin Brazılıadaǵy CENIPA ortalyǵyna jiberý týraly sheshim qabyldady.
