Aqtaýda teńiz jaǵalaýynda qyzǵa kúsh kórsetken er adam 30 táýlikke qamaldy, dep habarlaidy dalanews.kz.
Aqtaý qalasynyń ákimshilik quqyqbuzýshylyqtar jónindegi mamandandyrylǵan sotynda qoǵamdyq tártip pen jeke tulǵalardyń tynyshtyǵyn buzǵany úshin M.-ǵa qatysty is qaralǵan.
M. Samal-2 shaǵynaýdanyndaǵy Kaspii teńizi jaǵalaýynda, iaǵni qoǵamdyq orynda ainalasyndaǵylarǵa qurmetpen qaramai, qoǵamdyq tártipti jáne jeke tulǵalardyń tynyshtyǵyn buzyp, qasaqana usaq buzaqylyq jasaǵan.
Sot otyrysynda ol kinásin moiyndaǵan. Onyń kinási politsiia qyzmetkeriniń baianatymen, ákimshilik quqyqbuzýshylyq týraly hattamamen, №9649 sandy meditsinalyq kýálandyrý qortyndysymen jáne oqiǵa ornynan túsirilgen beinejazbamen tolyq dáleldengen.
Sot qaýlysymen M. QR ÁQBtK-niń 434-baby 2-bóligi boiynsha kináli dep tanylyp, oǵan 30 táýlik merzimge ákimshilik qamaqqa alý túrindegi jaza taǵaiyndaldy. Sot qaýlysy zańdy kúshine engen joq.
