Aqtaýda teatr «Ashyq» qosymshasy arqyly jumys isteidi
QR Táýelsizdiginiń 30 jyldyǵy aiasynda N.Jantórin atyndaǵy Mańǵystaý oblystyq mýzykalyq-drama teatry «Naizaǵai» dramasyn kórermenge usynbaq. Teatrǵa kórermender «ASHYQ» mobildik qosymshasy arqyly kiredi. Bul týraly Mańǵystaý oblystyq qoǵamdyq kommýnikatsiia ortalyǵynda ótken brifingte N.Jantórin atyndaǵy oblystyq mýzykalyq-drama teatr direktorynyń orynbasary Toqtamurat Tileý málim etti, – dep habarlaidy Dalanews.kz.
– Teatrǵa kelmes buryn telefonyńyzǵa arnaiy «Ashyq» mobildi qosymshasyn júktep alyńyz. Oǵan telefon nómiri arqyly avtorizatsiia jasap, JSN-di engizip, aldyn ala tirkelińiz. Teatrǵa kire beriste kirýdi tirkeý úshin nysannyń jeke QR-kodyn skanerden ótkizip, shyqqan nátijeni baqylaýshyǵa kórsetińiz. Eger uialy telefonyńyz bolmaǵan jaǵdaida, jeke kýáligińizdi ózińizben alyp júrseńiz jetkilikti. Baqylaýshy arnaiy baǵdarlama arqyly tekserip, densaýlyq statýsyńyzdy anyqtaityn bolady. Teatr qoiylymdarynyń jas sanatyna sai keletin, 7 jastan asqan balalardy alyp keletin bolsańyz, tekseris úshin olardyń kýáliginde kórsetilgen JSN qajet bolady, – dedi Toqtamurat Tileý.
Sondai-aq búginne bastap kórermenge «Naizaǵai» atty jańa spektakl usynylmaq. Pesanyń barysy Edil jaǵasyndaǵy shaǵyn qala turǵyndarynyń ómir salty, ádet-ǵurypy men zańdary týraly órbidi.
– «Naizaǵai» - taptalǵan sezim burqanysy, úrei men toryǵýǵa salynyp, ómirden túńilý. Spektakl – erkindikti ańsap, bostandyqqa umtylýymen qorlyqqa tóze almaýshylyq jaiynda. Árkim óz qalaýy boiynsha ne istegisi kelse de ózi biletin búgingi erkin zamanda da keibir jandar úshin sýitsid – aqiqattan qutylýdyń birden bir joly bolsa kerek. Demek azaptan qutylýdyń dara joly – ólim. «Naizaǵaidan» jasyrynatyn jer joq degendi meńzeidi. Qoiylym bizge ómirimiz, emotsiialarymyz, qaiǵy-qasiretimiz ben problemalarymyzdy kórkemdikpen jetkizedi. Birneshe ǵasyr ótse de qoiylymda kóteriletin taqyryptyń áli de ózekti ekendigin túsinesiz. Qazaq sahna keńistiginde Hadisha Bókeeva, Sábira Maiqanova, Sháken Aimanov jasap ketken úzdik obrazdardy teatrymyzdyń sahna tórinen jańasha jańǵyryp, ózgeshe túrlenýine kýá bolasyzdar, – dedi qoiýshy rejisser Dina Jumabaeva.
