Aqtaýda jańadan kelgen sarbazdardy basynan dýbinkamen uryp, tisin qaǵyp alǵan komandir jumystan qýyldy, - dep habarlaidy Dalanews.kz.
Bul týraly Qorǵanys ministrligi málimdedi. Ministrlik málimetinshe, oqiǵa byltyr tamyz aiynda Aqtaý garnizonyndaǵy áskeri bólimderdiń birinde bolǵan. Vzvod komandiriniń merzimdi qyzmettegi áskeri qyzmetshilerge qatysty bilikti asyra paidalanǵan.
Bul derek boiynsha tergeý is-sharalary júrgizilip, Aqtóbe garnizony áskeri sotynyń sheshimimen taraptardyń tatýlasýyna bailanysty is toqtatylǵan.
Qazaqstan Respýblikasy "Áskeri qyzmet jáne áskeri qyzmetshilerdiń mártebesi týraly" Zańynyń 26-baby 2-tarmaǵyna sáikes sot úkimi zańdy kúshine engennen keiin áskeri qyzmetshi teris sebeptermen QR Qarýly kúshteriniń qatarynan bosatylady.
Quqyq buzýshylyqtardyń aldyn alý, áskeri ortadaǵy jarǵyǵa jat qatynastardy anyqtap, olardyń jolyn kesý máseleleri Qarýly kúshter basshylyǵynyń erekshe baqylaýynda ekenin atap ótemiz. Olardyń kórinisteriniń barlyq nysandary boiynsha quqyqtyq jáne tártiptik sharalar qoldanylady.
Qarýly kúshterde mundai quqyq buzýshylyq faktileri biren-sarań ǵana ekenin aita ketý kerek. Bul turǵyda birde-bir jaǵdai nazardan tys qalmaidy. Tergeý is-sharalary barysynda qylmystyq qýdalaý organdaryna tolyq kómek kórsetiledi.
Buǵan deiin aqtaýlyq komandir jańadan kelgen sarbazdardyń basynan dýbinkamen uryp, tisin qaǵyp alǵanyn habarlaǵan bolatynbyz.
Aqtaýda komandir jańadan kelgen sarbazdyń basynan otyrǵyshpen urǵan. Sondai-aq ol áskerge shaqyrylǵandardyń basynan taiaqpen urǵan. Zardap shekken áskeriler komandirin keshirip, oǵan qatysty qylmystyq is sotta toqtatylǵan.
"Mysaly ol jańadan kelgenderdi jinap, bireýiniń basynan aǵash dýbinkamen urǵan. Jas sarbaz komandirdiń tegin durys aitpaǵany úshin birneshe soqqy jegen. Basqa da sarbazdardy dýbinkamen urǵan", - delingen materialda.
Taǵy bir oqiǵada áskeri qyzmetker sapqa keshigip kelgen sarbazdyń betinen judyryqpen uryp jibergen. Artynsha ony da basynan otyrǵyshpen uryp jibergen. Birneshe soqqy jegen sarbaz basynan ustap otyryp qalǵan, alaida komandir munymen toqtamai, urýyn jalǵastyrǵan. Taǵy bir sarbazdyń tisin qaǵyp alǵan.
"Eń qyzyǵy mynada. Tergeý barysynda bes sarbaz jábirlenýshi dep tanylǵan. Biraq olar komandirge keshirim berip, eki jaq tatýlasqany týraly aryz jazǵan. Aiyptalýshynyń ózi kinásin moiyndap, jábirlenýshi tarappen tatýlasqanyn aitqan", - dep jazylǵan materialda.
Nátijesinde Aqtóbe garnizony Áskeri soty taraptardyń tatýlasýyna bailanysty qylmystyq isti toqtatqan.
