Aqtaýda zorlyq-zombylyq pen adam ólimine ákelgen qylmystyq is boıynsha apelásıalyq sot úkimi shyqty. Buǵan deıin 29 jastaǵy fıtnes-jattyqtyrýshy Alına Serikovany urlap, zorlaǵan bes er adamǵa qatysty alǵashqy sot úkimine narazy bolǵan marqumnyń týystary apelásıaǵa júgingen edi, dep habarlaıdy Dalanews.kz.

Búgin, 31 qańtarda sot basty fıgýrant Nurgeldi Seıitqalıevti ómir boıyna bas bostandyǵynan aıyrdy.

Qalǵan sottalýshylarǵa uzaq merzimdi jaza taǵaıyndaldy:

Erkebulan Amanqos – 16 jyl

Aralbaı Mereı – 13 jyl

Darhan Qulbas – 13 jyl

Qýanysh Úsenǵalı – 13 jyl

Marqumnyń otbasyna moraldyq jáne materıaldyq shyǵyn retinde 30 mıllıon teńge tólenedi.

Alına Serikovanyń isi qoǵamda úlken rezonans týdyrdy. Onyń týystary sot sheshimi ádil bolýyn talap etip, basty aıyptalýshyǵa eń qatań jaza berilýin suraǵan edi. Bul jaǵdaı Qazaqstandaǵy genderlik zorlyq-zombylyqpen kúres máselesin qaıta kún tártibine shyǵardy.

Eske salaıyq, buǵan deıin nemolchikz_official áleýmettik jelide 2024 jyldyń mamyr aıynda Aqtaýda bolǵan jantúrshigerlik oqıǵany jarıalaǵan edi.

14 mamyr kúni túnde Aqtaýda bir top er adam sportpen aınalysyp, fıtnes-jattyqtyrýshy bolyp jumys istegen qyzdy kólikke kúshtep otyrǵyzyp, mefedron berip zorlaǵan. Tańǵa deıin qyzdy qınap, qala berdi telefony arqyly 2 mln teńge kóleminde nesıe rásimdegen. Qyzdyń týystary sot sheshimine qarsy shaǵym túsirip, istiń ádil qaralýyn surady.

Prokýror bas zorlaýshyǵa ómir boıyna bas bostandyǵynan aıyrý jazasyn suraǵan, al qalǵan tórteýine 15-16 jylǵa deıin jaza taǵaıyndalýy tıis bolatyn. Prokýratýra olardy zorlaý, jynystyq zorlyq-zombylyq, ózin-ózi óltirýge deıin jetkizý, esirtki zattaryn qoldanýǵa kóndirý, zańsyz bas bostandyǵynan aıyrý jáne adam urlaý, bopsalaý boıynsha aıyptaǵan. Alaıda sýdıa qyzdyń ólimin zorlyqpen baılanystyrmaǵan. Osylaısha qylmyskerlerdiń jazasyn jeńildetken. Marqumnyń otbasy bul sheshimge apelásıalyq shaǵym túsirdi.