Unico Play «Qara bekire» atty keń aýqymdy qazaqstandyq telehıkaıa túsirip jatyr. Bul joba otandyq kınematografıaǵa degen kózqarasty túbegeıli ózgertýi múmkin. Fort-SHevchenkonyń qatal tabıǵaty men Aqtaýdyń óndiristik kolorıti — Kaspıı mańyndaǵy áleýmettik jáne ekologıalyq máselelerdi kún tártibine qoıatyn shıelenisti oqıǵanyń basty alańyna aınalady.
Sońǵy zertteýlerge sáıkes, Kaspıı teńizi tartylyp, sýdyń deńgeıi 70 sm-ge túsip ketken, al keıbir jerlerinde 50 shaqyrymǵa jýyq teńiz tabany qurlyqqa aınalǵan. Bul ózgeris óńirdiń bıoalýandyǵy men tirshiligine úlken qaýip tóndirýde. Bekire, belýga, orys jáne juldyzsha bekire balyqtarynyń popýlásıasy shamadan tys aýlaý men tabıǵı mekeniniń buzylýy saldarynan 90%-dan astamǵa azaıǵan. Bul derekterge túsinikteme berýdiń qajeti shamaly*. Endi problemany ekran arqyly kópshilikke kórsetetin ýaqyt keldi.
Aǵaıyn men tabıǵat týraly drama
On jyl túrmede otyrǵan Nurbol 2012 jyly týǵan jeri — Aqtaýǵa oralady. Biraq shyndyqty estigende tóbe shashy tik turady: inisi Azat qara ýyldyryqpen aınalysatyn brakonerlik toptyń múshesi. Nurbol týǵan baýyryn qutqarý úshin taǵy da qylmys keń taralǵan jáne adam qolynan ýlanǵan sý asty álemine kirýge májbúr bolady. Munda adamdar óz-ózimen ǵana emes, tabıǵattyń ózi — adam qolynan jaralǵan stıhıamen kúresedi.
Áleýmettik salmaq pen janrlyq úılesim
«Qara bekire» — bul qarapaıym qylmystyq saga emes. Bul telehıkaıada otbasy ishindegi emosıonaldy qaqtyǵys pen qazaqstandyq «shyǵys vestern» toǵysady. Munda otbasylyq baılanystyń úzilýi, ekologıalyq apat, brakonerlik jáne qylmystyń órshýi sıaqty taqyryptar kóteriledi — jáne osynyń barlyǵy adamnyń ózi sebep bolǵan apat aıasynda órbıdi.
Tájirıbeli mamandar men jańa talanttardan quralǵan top
Rejıssýrany Berik Jahanov esimdi myqty jas daryn qolǵa alǵan. Al jobanyń bas prodúserleriniń biri — Anara Jýnýsova.
«Bul jaı ǵana serıal emes — bul jan aıqaıy. Biz shynaıy adamdar týraly, shynaıy Kaspıı týraly jáne shynaıy qıynshylyqtar týraly aıtamyz. Bul telehıkaıada teńiz — jaı ǵana fon emes, bul — tiri keıipker. Biz osy keıipkerlerden adamdar ózin tanyǵanyn qalaımyz», — deıdi bas prodúser Anara Jýnýsova.
Joba qazaqstandyq kınoǵa jańa esimder syılamaq. Unico Play komandasy qashanda tanymal juldyzdarǵa ǵana emes, talantty jańa akterlerge de múmkindik berýdi maqsat etedi.
«Bizdiń maqsatymyz — jaı ǵana kıno túsirý emes, kórermenniń júregine jetetin, shynaıy dúnıe jasaý. Sol úshin tájirıbesi mol akterlerdi de, jańa talanttardy da shaqyramyz. Kórermen ekrannan Damır Amangeldın, Aqjol Prımbetov, Almagúl Saǵyndyq sıaqty kópshilikke jaqsy tanys esimdermen birge jańa keıipkerlerdi kórgende, bul árdaıym qyzyqtyryp, baýrap alady. Mundaı jańa tynys oqıǵaǵa da, jalpy ındýstrıaǵa da serpin beredi. Bizdiń jaǵdaıda bul serpindi Eldos Shaıkenov pen Maqsat Rahmet alyp shyǵady. Olar teatr sahnasynda jaqsy tanys bolsa da, endi úlken aýdıtorıany baǵyndyrýǵa daıyn», — deıdi Anara Jýnýsova.
Serıal túsirilimindegi eń kúrdeli synaqtardyń biri — ashyq teńizdegi kórinister boldy.
«Aqtaý men Mańǵystaý oblysy turǵyndaryna bizdi jyly qabyldap, kómek kórsetkenderi úshin alǵys aıtamyz. Turǵyndar barynsha bizdi qoldap, kerek kezde qol ushyn bergenderiniń arqasynda túsirilimniń sý astyndaǵy eń qıyn ekshn sahnalary esh kedergisiz ótti. Kaspıı teńizin erekshe atap ótkim keledi – jumys barysynda aýa-raıy buzylyp, túsirilim kúnderi keıinge shegerilgen joq. Tabıǵattyń osy bir syıyn jaqsylyqtyń nyshany, sáttiliktiń belgisi dep qabyldadyq», - deıdi jobanyń prodúseri Anna Chekırtova.
Osy joba úshin arnaıy tanymal mamandar shaqyryldy. Olardyń ishinde «Qash», «Janym, senbeısiń!», «Kelınka Sabına» syndy jobalarmen tanylǵan qazaqstandyq operator Azamat Dýlatov jáne «Golıaf», «Dala qasqyry», «Nýlevye» fılmderi arqyly tanymal qoıýshy-sýretshi Ermek Ýtegenov bar. Túsirilimde sýasty kameralary, tabıǵı jaryq, sondaı-aq akterlerge ekstremaldy jaǵdaıda jumys isteýge múmkindik beretin barlyq saqtyq sharalary qoldanylýda. Mundaı tásil kórermendi shynaıy ári áserli atmosferaǵa elitip áketetin kórkem orta jasaıdy.
Anyqtama
Serıal: «Qara bekire»
Óndirýshi kompanıalar: Unico Play, Taurus Asia production
Janr: áleýmettik drama, ekodrama
Bas prodúserler: Anara Jýnýsova, Vasılıı Kýsenko, Irına Sosnovaıa, Beksultan Qazybek
Prodúser: Anna Chakırtova
Atqarýshy prodúser: Janara Týrpatova
Qoıýshy rejıser: Berik Jahanov
Ideıa avtorlary: Anara Jýnýsova, Dıas Bertıs
Senarı avtorlary: Elena Lısasına, Nurbol Erboluly, Qýanysh Stahanov, Alen Rahmetalıev, Raıymbek Áljanov, Darhan Ospanov, Aıdos Kemádıldaev, Ásel Qadyrseıit
Basty rólderde: Damır Amangeldın, Eldos Shaıkenov, Maqsat Rahmet, Almagúl Saǵyndyq, Meıirǵat Amangeldın, Aqjol Prımbetov, Bolat Uzaqov, Ádiljan Shombalov, Aıdar Karımbaev, Syrym Qashqabaev, Mereı Makajan, Alekseı Shemes
Qysqasha sınopsıs:
On jyl túrmede otyrǵan Nurbol Aqtaýǵa qaıta oralyp, jańa ómir bastap, inisi Azatpen tatýlasqysy keledi. Alaıda bul ońaı bolmaıdy. Óıtkeni Azat brakonerlik toptyń belsendi múshesi, onyń jetekshisi — Nurboldyń burynǵy dosy Qaırat. Azat aǵasyn ákesiniń ólimi úshin kinálaıdy.
Kaspııdiń tartylýy men balyq sharýashylyǵyna talas fonynda qylmystyq toptar arasynda qaqtyǵys órshı túsedi. Qaırattyń qarsylastary — Sapardyń toby Azatty tutqynǵa alǵan soń, Nurbol ony qutqarý úshin qylmystyq álemge qaıta kiredi.
Sonymen qatar, balyq ınspektory Malıka brakonerlerge qatysty aýqymdy jemqorlyq shemasyn tergep jatyr. Kútpegen jerden onyń joly Nurbolmen toǵysady, olardyń arasynda sezim paıda bolady — biraq Malıka onyń kim ekenin bilmeıdi.
