Aqtaýdaǵy memlekettik stomatologiiada em alǵan 9 jastaǵy balanyń tómengi jaq súieginiń basym bóligi zaqymdanǵan. Atalǵan oqiǵadan keiin eki dárigerge qatań sógis jariialandy, dep habarlaidy dalanews.kz.
Halyqstan málimetinshe, oqiǵa biyl aqpan aiynda bolǵan. Balanyń anasy Aqmaral Qaljanova uly Nurádildi stomatologqa tekserýge alyp barǵan. Onyń aitýynsha, balanyń tisi aýyrmaǵan, eshqandai shaǵymy bolmaǵan.
Soǵan qaramastan dárigerler balanyń tisterin emdeýge sheshim qabyldaǵan. Em kezinde jansyzdandyratyn dári salynǵannan keiin balanyń qyzýy kóterilip, qatty aýyryp, iegi isine bastaǵan.
Anasynyń sózinshe, dárigerlerge birneshe ret qaita qaralǵanymen, balanyń jaǵdaiy kúnnen-kúnge nasharlai bergen. Sonyń saldarynan birneshe ai ishinde onyń tómengi jaq súieginiń shamamen 60–70 paiyzy zaqymdanǵan.
"Keiin Astanadaǵy dárigerler balaǵa "tómengi jaq súieginiń jedel odontogendik osteomieliti" degen diagnoz qoiǵan. Osy ýaqytqa deiin oǵan súiektiń jansyzdanǵan bólikterin alyp tastaý úshin eki operatsiia jasalǵan. Al alda jaq súiegin qalpyna keltirýge arnalǵan taǵy bir kúrdeli ota kútip tur. Qazir otbasy oǵan qajetti qarajat jinap jatyr", - deidi derekkóz.
Mańǵystaý oblysynyń densaýlyq saqtaý basqarmasy júrgizgen qyzmettik tekserýdiń qorytyndysy boiynsha memlekettik stomatologiianyń eki dárigerine qatań sógis berildi. Sondai-aq emhana basshylyǵyna anyqtalǵan kemshilikterdi joiyp, balalarǵa kórsetiletin stomatologiialyq kómektiń sapasyn baqylaýdy kúsheitý tapsyryldy.
Alaida balanyń ata-anasy mundai jazamen kelispeidi. Olar dárigerlerdiń áreketine qylmystyq-quqyqtyq baǵa berýdi talap etip otyr.
Otbasynyń aitýynsha, emnen keiin meditsinalyq qujattarǵa shyndyqqa sáikes kelmeitin málimetter engizilgen. Sondyqtan olar politsiiadan dárigerlerdiń kásibi mindetin durys oryndamaýy, meditsinalyq qujattardy burmalaýy jáne salǵyrttyq tanytýy múmkin degen kúdikpen tekserý júrgizýdi surady.
