Aqtaýda er adam oblystyq ákimdik aldynda ózin jaǵyp jibergen. Ákimdik ókilderi mán-jaidy túsindirdi, - dep habarlaidy Dalanews.kz.
BAQ-ta buǵan deiin er adam Aqtaýdaǵy oblystyq ákimdik aldyna kelip, sheneýniktermen sóilesip, keiin ózin órtep jibergeni týraly aqparat tarady. Bul jaǵdai videoǵa túsip qalǵan. Kadrlarda er adam ǵimarattyń syrtynda, kóshede ózin órtep jibergeni kórinedi.
Mańǵystaý oblysy ákimdiginiń baspasóz qyzmetiniń málimetine súiensek, 5 jeltoqsanda er adam memlekettik mekemege kelip, ákimmen kezdesýdi talap etken.
"Ákimdik qyzmetkerleri oǵan oblys ákiminiń jeke máseleler boiynsha azamattardy qabyldaý kestesimen kelýin surap, búgin qabyldamaitynyn túsindirdi. Óńir turǵynyn Qaraqiia aýdany ákiminiń orynbasary qabyldady. Qanaǵattanbaǵan azamat E. ózine janǵysh qospa shashyp, órtep jiberdi. Politsiia jáne ákimdik qyzmetkerleriniń kúshimen órt jedel sóndirildi, jedel járdem shaqyryldy, ol kelgenge deiin zardap shekken adamǵa alǵashqy meditsinalyq kómek kórsetildi", - dep habarlady ákimdiktiń baspasóz qyzmeti ókili.
Dárigerlerdiń sózinshe, naýqastyń jaǵdaiy aýyr.
Mańǵystaý oblystyq Politsiia departamenti "Óz-ózin óltirýge deiin jetkizý" deregi boiynsha qylmystyq is qozǵaǵan.
"Qazir bolǵan oqiǵanyń barlyq mán-jaiyn anyqtaý úshin tergeý júrgizilip jatyr", - dep tolyqtyrdy vedomstvo ókilderi.
