Mańǵystaý oblysy boıynsha Sıfrlyq tehnologıalar basqarmasy osy joba aıasynda QR İshki ister mınıstrligi Mańǵystaý oblysynyń polısıa departamenti jáne jeke seriktes «Sergek Projects Ltd» kompanıasymen birlesip, úshjaqty kelisimge qol qoıdy.
Joba boıynsha barlyǵy 1138 baqylaý kamerasy ornatylady.
Kameralardyń kómegimen polısıa qyzmetkerleri jol qozǵalysy men qoǵamdyq quqyq buzýshylyqtardy anyqtaýǵa múmkindik almaq. Beınebaqylaý kameralaryndaǵy jazba 30 kún boıy saqtalady. «Sergek» júıesin ornatý birinshi kezekte jol-kólik oqıǵalarynyń aldyn alýǵa jáne jol qozǵalysy erejelerin buzýdyń aldyn alýǵa baǵyttalǵan.
Aıta ketý kerek, «Sergek» qoǵamdyq jáne jol qaýipsizdiginiń zıatkerlik júıesi qazaqstandyq jasaqtaýshylardyń týyndysy.
Aqtaý qalasynda 95 núktede 380 beınebaqylaý kamerasy, Munaıly aýdanynda 35 núktede 140 beınebaqylaý kamerasy jelilik ýchaskelerge ornatylady.
Aqtaý qalasyndaǵy kóshe qıylystarynda 13 núktede 156 kamera, Munaıly aýdanynda 5 núktede 60 kamera ornatylmaq.
Sondaı-aq, Aqtaý qalasynda 402 qoǵamdyq qaýipsizdik kamerasy, 50 núktede 100 kamera, Munaıly aýdanynda 100 núktede 300 beınebaqylaý kamerasy bolmaq. Temir jol ótkelderinde de kameralar ornatylady.
Sonymen qatar, Aqtaý qalasynda arnaıy derekterdi óńdeý ortalyǵy, Munaıly aýdanynda jedel basqarýdyń shaǵyn ortalyǵy ashylmaq.
Qazirgi ýaqytta «Sergek» qoǵamdyq jáne jol qaýipsizdiginiń zıatkerlik júıesin ornatý jumystary bastaldy. Júıeni tolyq iske qosý 2023 jyldyń sáýir aıyna josparlanǵan.
