Aqtaý mańyndaǵy ushaq apatynyń tergeý qorytyndysy 2025 jyldyń sońyna deiin jariialanady. Embraer 190 ushaǵynyń Aqtaý mańyndaǵy apaty boiynsha tergeýdiń qorytyndysy 2025 jyldyń sońyna deiin jariialanady. Bul týraly Qazaqstan Respýblikasynyń Kólik ministrliginiń baspasóz qyzmeti málimdedi, dep habarlaidy Dalanews.kz.
31 jeltoqsanda BIZDIÑ ORTA podkastynda Qazaqstannyń kólik vitse-ministri Talǵat Lastaev apattyń aldyn ala esebi 30 kún ishinde jariialanatynyn málimdedi. Degenmen Kólik ministrligi bul tergeý jumystary Halyqaralyq azamattyq aviatsiia uiymynyń erejelerine sáikes 12 aiǵa deiin sozylýy múmkin ekenin túsindirdi.
Ministrlik ókilderi tergeýdiń eń uzaq merzimi 36 aidy quraitynyn atap ótti. Alaida sarapshylar jumysty bir jyldyń ishinde aiaqtaýǵa tyrysatyndaryn aitty.
Aita keteiik, 2024 jyly 25 jeltoqsanda jergilikti ýaqyt boiynsha 11.30-da Aqtaý mańynda Bakýden Groznyiǵa ushyp bara jatqan ushaq apatqa ushyrady. Bul - Azerbaijan Airlines áýekompaniiasyna tiesili Embraer 190 ushaǵy.
Aqparat boiynsha ushaq bortynda 67 adam, onyń ishinde 5 ekipaj múshesi bolǵan.
Apattan 6 qazaqstandyq kóz jumdy. Jalpy qaza tapqandar sany - 38. Qaiǵyly oqiǵadan 29 adam aman qaldy.
Keiinirek Chikago konventsiiasynyń 13-qosymshasyna sáikes Qazaqstan Ázerbaijan men Reseidiń aviatsiialyq organdarymen aqyldasqan soń, QR Kólik ministri Marat Qarabaev basqaratyn komissiia Embraer ushaǵynyń qara jáshigin Braziliiadaǵy CENIPA ortalyǵyna jiberý týraly sheshim qabyldady.
