QR Ulttyq Bank basshysy Tımýr Súleımenov dollar baǵamyndaǵy ózgeris Ulttyq qordan balalarǵa bólenetin tólemderge esh áser etpeıtinin aıtty. Óıtkeni ol shetel valútasyndaǵy uzaqmerzimdi jınaqtar qataryna jatady, dep habarlaıdy Dalanews.kz.

"Ulttyq qor ınvestısıalyq kirisiniń, ıaǵnı ondaǵy aktıvti ınvestısıalyq basqarýdan túsetin tabystyń  50%-y balalarǵa bólinedi. Al ol aqsha shotqa dollar túrinde túsedi, bala tek 18 jasqa tolyp, ómir súrý jaǵdaılaryn jaqsartýǵa, bilim alýǵa nemese medısınalyq qajettilikterge qatysty ótinish toltyryp ákelgende ǵana ol teńgege aıyrbastalady. Ulttyq qordaǵy barlyq esep dollarmen júrgiziletindikten, sáıkesinshe onyń baǵamyndaǵy ózgeristiń teris áseri joq", - dep túsindirdi Tımýr Súleımenov.

Onyń aıtýynsha, Ulttyq qordyń ınvestısıalyq kirisi qandaı bolatynyn qazir boljaý qıyn, óıtkeni qazir naryqtardaǵy jaǵdaı óte qubylmaly.

"Qatty "oınap jatyr", birese joǵary, birese tómen degendeı. Ózderińiz kórdińizder, S & P, NASDAQ birese qyzyl, birese jasyl aımaqty kórsetip turǵanyn. Biz oǵan áser ete almaımyz, bul - jahandyq naryqtar. Jaǵdaı qalypqa kelip, naryqtar qaıta basyn tikteıdi dep úmittenemiz", — dep sózin tolyqtyrdy Ulttyq Bank basshysy.

Buǵan deıin Ulttyq Bank bazalyq mólsherlemeniń burynǵy kólemi - 16,5% deńgeıinde qaldyrǵandaryn málimdegen. Alaıda retteýshi organ kútpegen shalt oqıǵalar jaǵdaı oryn alyp jatsa, ony merziminen buryn ózgertý týraly quziretin óz enshilerine qaldyryp otyrǵandaryn da naqtylady. Sondaı-aq Tımýr Súleımenov teńge devalvasıasy yqtımaldylyǵyna qatysty pikir bildirdi.