Qazaqstanda janarmaidyń elden zańsyz shyǵarylýyna qarsy kúres jalǵasyp jatyr. Jyl basynan beri shekara beketterinde janarmaidy shetelge zańsyz alyp ótpek bolǵan 712 áreket toqtatyldy, dep habarlaidy dalanews.kz.
Energetika ministrligi engizgen ýaqytsha tyiym kezinde janarmaidy syrtqa shyǵarýdyń alty zańsyz joly anyqtalyp, 1,5 myń tonnadan astam ónim tárkilengen.
Biyl osyǵan bailanysty segiz qylmystyq is qozǵaldy. Onyń ishinde esepke alynbaǵan 28,5 myń tonna munaidy zańsyz óńdeý jáne 190 myń tonnadan astam benzindi shetelge jasyryn tasymaldaý derekteri bar. Mamandardyń málimetinshe, mundai zańsyz saýdanyń kólemi 37,2 mlrd teńgeden asqan.
Quqyq qorǵaý organdary janarmai tasý úshin kólikterge qosymsha bak ornatý faktilerin de anyqtap jatyr. Máselen, Jambyl oblysynda sáýirdiń sońynan maýsymnyń ortasyna deiin osyndai 73 jaǵdai tirkelgen. Qordai aýylyndaǵy 16 avtoservis tekserilip, altaýynyń ielerine qatysty shara qoldanylǵan.
Qarjylyq monitoring agenttigi munai ónimderin shetelge shyǵarýǵa bailanysty jalǵan qujattardy anyqtaý jumystaryn júrgizýde. Jyl basynan beri 57 tekserý uiymdastyrylyp, munai ónimderinen synamalar alynǵan.
Quzyrly organdardyń aitýynsha, bul sharalardyń barlyǵy ishki naryqta janarmai tapshylyǵyna jol bermeý jáne el turǵyndaryn turaqty qamtamasyz etý úshin qolǵa alynyp otyr.
