AQSh-tyń energetika ministri Kris Rait Amerika Qurama Shtattary Venesýelaǵa qatysty teńiz blokadasyn alyp tastaýdy, alaida onyń munai eksportyn baqylaýǵa alýdy josparlap otyrǵanyn aitty, dep habarlaidy Dalanews.kz Deutsche Welle-ge silteme jasap.
Bul týraly sheneýnik bir kún buryn Goldman Sachs bankiniń energetika jónindegi konferentsiiasynda málimdegen.
Onyń aitýynsha, munai satýdan túsken kirister Vashingtonnyń baqylaýyndaǵy esepshottarǵa túsip, keiin Venesýela ekonomikasyn qalpyna keltirýge baǵyttalmaq.
Raittyń habarlaýynsha, aldymen AQSh Venesýela qoimalarynda saqtaýly turǵan munaidy satady, odan keiin «belgisiz bir ýaqyt aralyǵynda» elde óndiriletin munaidy da ótkizý josparlanyp otyr.
"Qazirgi jaǵdaidaǵydai munai jetkizilimin buǵattaýdyń ornyna, biz onyń AQSh-taǵy jáne álemdegi munai óńdeý zaýyttaryna túsýine múmkindik beremiz, osylaisha munai jetkizilimin jaqsartamyz. Alaida bul satylymdardy AQSh úkimeti júzege asyrady", – dep túsindirdi ministr.
Osy rette Bloomberg agenttiginiń málimetinshe, qarajatty AQSh Qarjy ministrliginiń esepshottarynda ornalastyrý olardy Venesýelanyń kreditorlarynan qorǵaýǵa múmkindik beredi. Agenttikke AQSh ákimshiliginiń eki ókili elge qatysty sanktsiialardy birtindep jeńildetý josparlanyp otyrǵanyn aitqan.
Meksika shyǵanaǵy jaǵalaýyndaǵy kóptegen amerikalyq munai óńdeý zaýyttary Venesýelada óndiriletin aýyr, kúkirt mólsheri joǵary munaidy óńdeýge mamandanǵan. Buryn olar venesýelalyq shikizattyń iri satyp alýshylary bolǵan, alaida sońǵy jyldary AQSh sanktsiialaryna bailanysty jetkizilimder shekteldi.
Venesýelanyń munai salasyn qalpyna keltirýge amerikalyq kóshbasshy Donald Tramp Chevron, ConocoPhillips jáne Exxon Mobil sekildi amerikalyq kompaniialardy tartýdy kózdep otyr. Materialda atap ótilgendei, Venesýelanyń munai ónerkásibi Nikolas Madýro men onyń aldyndaǵy Ýgo Chaves biligi kezeńinde aitarlyqtai quldyraǵan.
Societe Generale bankiniń shikizat naryqtaryn taldaý jónindegi direktory Maikl Hei baǵalaýynsha, 1998 jyly, Chaves bilikke kelmei turyp, Venesýelada táýligine 3,4 million barrel munai óndirilse, qazir bul kórsetkish 1 million barrelden tómen túsken.
Bloomberg deregine sáikes, Tramp ákimshiligi birneshe munai kompaniiasymen kelissózder júrgizip qoiǵan. Agenttik derekkózderiniń aitýynsha, prezident Aq úide energetikalyq kompaniialardyń basshylarymen kezdesý ótkizýdi josparlap otyr.
Exxon men ConocoPhillips buǵan deiin Venesýelada jumys istegen, alaida 2000-jyldary olardyń aktivteri memleket menshigine alynǵan. Qazirgi ýaqytta elde shekteýli kólemde munai óndirýmen tek Chevron ǵana ainalysyp otyr.
Amerikalyq munai kompaniialary Venesýelada jumysty qaita bastaýǵa qatysty ázirge ashyq málimdeme jasaǵan joq. Bloomberg jazýynsha, olar el ishindegi jáne AQSh-taǵy saiasi jaǵdaidyń turaqtylyǵyna kóz jetkizgisi keledi.
Osy habarlamalar aiasynda 7 qańtarda munai baǵasy tómendedi. Brent markaly munai 1,3 paiyzǵa arzandap, barreli 60 dollardan tómen tústi, al amerikalyq WTI 2 paiyzǵa tómendep, 56 dollar boldy.
