Resei Syrtqy ister ministri Sergei Lavrov qyrkúiek aiynyń basynda Máskeýdegi MMHQI ýniversitetiniń stýdentterimen kezdesý barysynda kópshilik “Orta dáliz” dep atap ketken Transkaspii halyqaralyq kólik jolyna, iaǵni Qytaidy Ortalyq Aziia, Kavkaz, Túrkiia, sondai-aq Shyǵys Eýropa arqyly Eýropalyq odaqpen bailanystyratyn temirjol konteinerlik júk tasymaldaý jelisine AQSh-pen qatar, basqa da “syrtqy oiynshylar kóp kóńil bóle bastaǵanyn” atap ótti. Lavrovtyń sózinshe, AQSh-tyń Ortalyq Aziianyń ekonomikalyq bolashaǵyna kóz tastaýy Reseidiń damýyn aitarlyqtai tejeidi, dep habarlaidy Dalanews.kz.
Lavrov Resei Ortalyq Aziia elderimen ekonomikalyq jáne strategiialyq turǵydan birneshe kelisim ornatqanyn, sonyń ishinde Ujymdyq qaýipsizdik sharty uiymy, Eýraziialyq ekonomikalyq odaq jáne Táýelsiz Memleketter Dostastyǵymen “jyly jáne odaqtastyq” qarym-qatynasta ekenin jetkizdi. Sonymen qatar ol “Resei eshbir eldiń basqa seriktesterimen tyǵyz bailanys ornatýyna kedergi jasai almaidy” dep qosty.
Lavrovtvń sózinshe, Ortalyq Aziiaǵa kóz tastaǵan amerikalyq sheneýnikterdiń josparynda qandai da bir esep bar.
“Ortalyq Aziiadaǵy seriktesterimiz ben odaqtastarymyz Batyspen qarym-qatynasyn nyǵaitqan kezde, Batys óziniń igi ári ashyq maqsattaryn júzege asyrýmen qatar, Resei Federatsiiasynyń ondaǵy yqpalyna kedergi keltiretini aiqyn. Oǵan esh kúmánim joq”, – dedi ol.
Ortalyq Aziiamen saýda kedergilerin azaityp, kedendik máseleni jeńildetý úshin AQSh Batystyń investitsiiasyn ilgeriletetin B5+1 júiesi arqyly áreket etedi. Jaqynda Ortalyq Aziia elderi saýdany damytýǵa bailanysty birneshe kelisimge qol qoidy, al AQSh keibir elderge infraqurylymyn jańartýǵa kómektesti.
“Tamyz aiynda AQSh shekaralyq júieni tiimdirek etý úshin Qazaqstannyń Keden qyzmetine Dell Technologies Inc. serverlerin usyndy. Innovatsiialyq tehnologiialardy qabyldaý kez kelgen isti ońtailandyrady, dáldikti arttyrady, bizneske qolaily ortany qalyptastyrady, investorlardy tartýǵa jáne ekonomikalyq ósýge múmkindik beredi”, - dedi AQSh-tyń Qazaqstandaǵy elshisi Deniel Rozenbliým óz málimdemesinde.
Al Ýkrainadaǵy soǵys Kremldiń Ortalyq Aziia memleketterimen múmkindigin azaitty. Resei óńir memleketterimen batys sanktsiialaryn ainalyp ótý úshin paidalanýda, iaǵni soǵysqa qajetti taýarlardy alý úshin jasyryn saýdaǵa táýeldi. Al Qytai Reseige qos maqsatty tehnologiialardy jetkizýde jáne Ortalyq Aziia elderiniń jetekshi saýda seriktesi retinde Reseidi basyp ozdy. Lavrov óz sózinde Qytaidy “senimdi seriktesi” dep atady.
