رەسەي سىرتقى ىستەر ءمينيسترى سەرگەي لاۆروۆ قىركۇيەك ايىنىڭ باسىندا ماسكەۋدەگى ممحقي ۋنيۆەرسيتەتىنىڭ ستۋدەنتتەرىمەن كەزدەسۋ بارىسىندا كوپشىلىك “ورتا ءدالىز” دەپ اتاپ كەتكەن ترانسكاسپيي حالىقارالىق كولىك جولىنا، ياعني قىتايدى ورتالىق ازيا، كاۆكاز، تۇركيا، سونداي-اق شىعىس ەۋروپا ارقىلى ەۋروپالىق وداقپەن بايلانىستىراتىن تەمىرجول كونتەينەرلىك جۇك تاسىمالداۋ جەلىسىنە اقش-پەن قاتار، باسقا دا “سىرتقى ويىنشىلار كوپ كوڭىل بولە باستاعانىن” اتاپ ءوتتى. لاۆروۆتىڭ سوزىنشە، اقش-تىڭ ورتالىق ازيانىڭ ەكونوميكالىق بولاشاعىنا كوز تاستاۋى رەسەيدىڭ دامۋىن ايتارلىقتاي تەجەيدى، دەپ حابارلايدى Dalanews.kz.
لاۆروۆ رەسەي ورتالىق ازيا ەلدەرىمەن ەكونوميكالىق جانە ستراتەگيالىق تۇرعىدان بىرنەشە كەلىسىم ورناتقانىن، سونىڭ ىشىندە ۇجىمدىق قاۋىپسىزدىك شارتى ۇيىمى، ەۋرازيالىق ەكونوميكالىق وداق جانە تاۋەلسىز مەملەكەتتەر دوستاستىعىمەن “جىلى جانە وداقتاستىق” قارىم-قاتىناستا ەكەنىن جەتكىزدى. سونىمەن قاتار ول “رەسەي ەشبىر ەلدىڭ باسقا سەرىكتەستەرىمەن تىعىز بايلانىس ورناتۋىنا كەدەرگى جاساي المايدى” دەپ قوستى.
لاۆروۆتۆڭ سوزىنشە، ورتالىق ازياعا كوز تاستاعان امەريكالىق شەنەۋنىكتەردىڭ جوسپارىندا قانداي دا ءبىر ەسەپ بار.
“ورتالىق ازياداعى سەرىكتەستەرىمىز بەن وداقتاستارىمىز باتىسپەن قارىم-قاتىناسىن نىعايتقان كەزدە، باتىس ءوزىنىڭ يگى ءارى اشىق ماقساتتارىن جۇزەگە اسىرۋمەن قاتار، رەسەي فەدەراسياسىنىڭ ونداعى ىقپالىنا كەدەرگى كەلتىرەتىنى ايقىن. وعان ەش كۇمانىم جوق”، – دەدى ول.
ورتالىق ازيامەن ساۋدا كەدەرگىلەرىن ازايتىپ، كەدەندىك ماسەلەنى جەڭىلدەتۋ ءۇشىن اقش باتىستىڭ ينۆەستيسياسىن ىلگەرىلەتەتىن B5+1 جۇيەسى ارقىلى ارەكەت ەتەدى. جاقىندا ورتالىق ازيا ەلدەرى ساۋدانى دامىتۋعا بايلانىستى بىرنەشە كەلىسىمگە قول قويدى، ال اقش كەيبىر ەلدەرگە ينفراقۇرىلىمىن جاڭارتۋعا كومەكتەستى.
“تامىز ايىندا اقش شەكارالىق جۇيەنى تيىمدىرەك ەتۋ ءۇشىن قازاقستاننىڭ كەدەن قىزمەتىنە Dell Technologies Inc. سەرۆەرلەرىن ۇسىندى. يننوۆاسيالىق تەحنولوگيالاردى قابىلداۋ كەز كەلگەن ءىستى وڭتايلاندىرادى، دالدىكتى ارتتىرادى، بيزنەسكە قولايلى ورتانى قالىپتاستىرادى، ينۆەستورلاردى تارتۋعا جانە ەكونوميكالىق وسۋگە مۇمكىندىك بەرەدى”، - دەدى اقش-تىڭ قازاقستانداعى ەلشىسى دەنيەل روزەنبليۋم ءوز مالىمدەمەسىندە.
ال ۋكرايناداعى سوعىس كرەملدىڭ ورتالىق ازيا مەملەكەتتەرىمەن مۇمكىندىگىن ازايتتى. رەسەي ءوڭىر مەملەكەتتەرىمەن باتىس سانكسيالارىن اينالىپ ءوتۋ ءۇشىن پايدالانۋدا، ياعني سوعىسقا قاجەتتى تاۋارلاردى الۋ ءۇشىن جاسىرىن ساۋداعا تاۋەلدى. ال جۇڭگو رەسەيگە قوس ماقساتتى تەحنولوگيالاردى جەتكىزۋدە جانە ورتالىق ازيا ەلدەرىنىڭ جەتەكشى ساۋدا سەرىكتەسى رەتىندە رەسەيدى باسىپ وزدى. لاۆروۆ ءوز سوزىندە قىتايدى “سەنىمدى سەرىكتەسى” دەپ اتادى.
