12 mamyrda AQSh azamaty asyrap alǵan qaraǵandylyq qyzdar Astanaǵa keldi, dep habarlaidy Dalanews.kz.
“Habar” telearnasynyń málimetinshe, olar 2005 jyly 25 bala bolyp bir ushaqpen Kaliforniiaǵa attanǵan. Endi araǵa 20 jyl salyp, týǵan jerge alǵash ret taban tiredi. Qyzdarmen birge olardyń asyraýshy anasy Sheron da keldi. Ol Qaraǵandydaǵy balalar úiinen birden bes qazaq qyzyn asyrap alǵan.
Búgingi sapar – Qazaqstanmen qaita qaýyshýǵa, túp tamyryn tanýǵa baǵyttalǵan mańyzdy qadam. Qyzdar endi birneshe apta boiy týǵan elin aralap, ulttyq mádenietpen, tarihpen, salt-dástúrmen tereńirek tanysady.
Bul kezdesýdi uiymdastyrýǵa tórt jyl boiy otbasymen bailanysta bolǵan mediamenedjer, QR eńbek sińirgen qairatkeri Gúlmira Daiyrbaeva uiytqy boldy.
“2021 jyly Sheronnyń otbasymen alǵash ret bailanysqa shyqtym. Onyń týǵan eki uly bar, al 2005 jyly Qaraǵandydaǵy balalar úiinen bes qazaq qyzyn asyrap alǵan. Osy jyldar ishinde bul qyzdardy ne el, ne elshilik, ne konsýldyq, ne týǵan anasy izdemegen. Olarda tek balalar úiiniń estelikteri ǵana qalǵan. Meniń armanym – olar osy zamanǵy Astanany, búgingi Qazaqstandy kórip, eldiń qalai ósip-órkendep jatqanyn óz kózderimen kórý edi”, — deidi Gúlmira Daiyrbaeva.
AQSh-ta ósken Súikimdi esimdi boijetken týǵan eline alǵash kelýiniń áserimen bólisti.
“Bul jerde bolý – men úshin ári qýanyshty, ári erekshe sezim. 19 jyldan keiin týǵan ápkemmen qaita kóristim. Bizdi qazaqtyń salt-dástúrimen qarsy aldy. Baýyrsaqtyń dámi esime tústi. Kaliforniiada da ulttyq taǵam satatyn dúkender bolatyn, biraq olardyń ataýyn dál qazir esime túsire almai turmyn”, — deidi ol.
