12 مامىردا اقش ازاماتى اسىراپ العان قاراعاندىلىق قىزدار استاناعا كەلدى، دەپ حابارلايدى Dalanews.kz.
“حابار” تەلەارناسىنىڭ مالىمەتىنشە، ولار 2005 جىلى 25 بالا بولىپ ءبىر ۇشاقپەن كاليفورنياعا اتتانعان. ەندى اراعا 20 جىل سالىپ، تۋعان جەرگە العاش رەت تابان تىرەدى. قىزدارمەن بىرگە ولاردىڭ اسىراۋشى اناسى شەرون دا كەلدى. ول قاراعاندىداعى بالالار ۇيىنەن بىردەن بەس قازاق قىزىن اسىراپ العان.
بۇگىنگى ساپار – قازاقستانمەن قايتا قاۋىشۋعا، ءتۇپ تامىرىن تانۋعا باعىتتالعان ماڭىزدى قادام. قىزدار ەندى بىرنەشە اپتا بويى تۋعان ەلىن ارالاپ، ۇلتتىق مادەنيەتپەن، تاريحپەن، سالت-داستۇرمەن تەرەڭىرەك تانىسادى.
بۇل كەزدەسۋدى ۇيىمداستىرۋعا ءتورت جىل بويى وتباسىمەن بايلانىستا بولعان مەديامەنەدجەر، ق ر ەڭبەك سىڭىرگەن قايراتكەرى گۇلميرا دايىربايەۆا ۇيىتقى بولدى.
“2021 جىلى شەروننىڭ وتباسىمەن العاش رەت بايلانىسقا شىقتىم. ونىڭ تۋعان ەكى ۇلى بار، ال 2005 جىلى قاراعاندىداعى بالالار ۇيىنەن بەس قازاق قىزىن اسىراپ العان. وسى جىلدار ىشىندە بۇل قىزداردى نە ەل، نە ەلشىلىك، نە كونسۋلدىق، نە تۋعان اناسى ىزدەمەگەن. ولاردا تەك بالالار ءۇيىنىڭ ەستەلىكتەرى عانا قالعان. مەنىڭ ارمانىم – ولار وسى زامانعى استانانى، بۇگىنگى قازاقستاندى كورىپ، ەلدىڭ قالاي وسىپ-وركەندەپ جاتقانىن ءوز كوزدەرىمەن كورۋ ەدى”، — دەيدى گۇلميرا دايىربايەۆا.
اقش-تا وسكەن سۇيكىمدى ەسىمدى بويجەتكەن تۋعان ەلىنە العاش كەلۋىنىڭ اسەرىمەن ءبولىستى.
“بۇل جەردە بولۋ – مەن ءۇشىن ءارى قۋانىشتى، ءارى ەرەكشە سەزىم. 19 جىلدان كەيىن تۋعان اپكەممەن قايتا كورىستىم. ءبىزدى قازاقتىڭ سالت-داستۇرىمەن قارسى الدى. باۋىرساقتىڭ ءدامى ەسىمە ءتۇستى. كاليفورنيادا دا ۇلتتىق تاعام ساتاتىن دۇكەندەر بولاتىن، ءبىراق ولاردىڭ اتاۋىن ءدال ءقازىر ەسىمە تۇسىرە الماي تۇرمىن”، — دەيدى ول.
