Asyrandy balalar týǵan ata-analaryn tabý úshin bir-birine kómektesedi. AQSh-ta amerikalyqtar asyrap alǵan qazaqstandyq balalardyń birlestigi quryldy, dep habarlaidy Dalanews.kz.
Arman Ákishev esimdi qazaq jigiti qolǵa alǵan uiym qazirdiń ózinde birneshe otbasynyń qaita qaýyshýyna sebep bolypty.
Qazaqy shapany men bórkin kigen Arman Ákishev buǵan deiingi jyldary Niý-Iork pen Pensilvaniiada ótken Naýryz merekesine qatyssa, bul joly Vashington aimaǵyndaǵy qazaqtarmen tanysýdy jón kóripti. Jerdiń shalǵailyǵyna qaramai, birneshe saǵat jol júrip kelgen, dep jazady qazaqstan.tv.
"Birinshiden men qazaqpyn. Sondyqtan mundai bas qosýlardan qalmaýǵa tyrysam. Osyndai sátterde jańa dostar tabasyń. Onyń ústine biz qurǵan birlestik ulǵaiǵanyn qalaimyn. Ol úshin mundai jiyndar asa mańyzdy”, - deidi Arman Ákishev.
Arman Pravolardyń týmasy. Osydan jiyrma jyl buryn amerikalyq otbasy asyrap alǵan. Dese de shyqqan tegin bilýge degen umtylysy arqasynda úsh jyl buryn týǵan áke sheshesin tabady. Tipti Qazaqstanǵa baryp, týystaryn kórip qaitqan. "Meniń jolym boldy, bir ai ǵana izdedim deidi ózi. Al kóp asyrandy bala jyldar boiy armanyna jete almai júr.
"Amerikalyqtar jeti myńdai bala asyrap alǵanyn bilemiz. Solardyń kóbi shyqqan tegin bilgisi keledi. Sol sebepti de osy birlestikti qurdyq. Qazaq eline qalai ushyp barýǵa bolady. Týǵan áke sheshesin, aǵaiyn týystaryn qalai izdeý kerek. Osy máselerde qol ushyn sozamyz ári Qazaqstan mádenietimen etene tanysýyna kómektesemiz", - deidi Asyrandy balalar birlestiginiń jetekshisi Arman Ákishev.
Birlestik Qazaqstan elshiligimen qarym qatynas ornatyp, áleýmettik jeli arqyly belsendi jumys istei bastady. Nátijesi de jaman emes. Bir jyldyń ishinde alty qazaq balasy týystarymen qaýyshqan. Ázirge onlain kezdesý ótkizetin uiym músheleri bolashaqta qatary molaisa týǵan jermen bailanysyn keńeitý úshin turaqty quryltai ótkizip turmaq. Al 5 jasynda eriksiz muhit assa da Armannyń týǵan jerge degen mahabbaty erek. Tipti, kóliginiń syrtyna da, ishine de el bairaǵyn qoiyp alǵan. Biyl jazda Qazaqstanǵa arnaiy baryp, ana tilin úirenbek niette.
