اسىراندى بالالار تۋعان اتا-انالارىن تابۋ ءۇشىن بىر-بىرىنە كومەكتەسەدى. اقش-تا امەريكالىقتار اسىراپ العان قازاقستاندىق بالالاردىڭ بىرلەستىگى قۇرىلدى، دەپ حابارلايدى Dalanews.kz.
ارمان اكىشيەۆ ەسىمدى قازاق جىگىتى قولعا العان ۇيىم ءقازىردىڭ وزىندە بىرنەشە وتباسىنىڭ قايتا قاۋىشۋىنا سەبەپ بولىپتى.
قازاقى شاپانى مەن بوركىن كيگەن ارمان اكىشيەۆ بۇعان دەيىنگى جىلدارى نيۋ-يورك پەن پەنسيلۆانيادا وتكەن ناۋرىز مەرەكەسىنە قاتىسسا، بۇل جولى ۆاشينگتون ايماعىنداعى قازاقتارمەن تانىسۋدى ءجون كورىپتى. جەردىڭ شالعايلىعىنا قاراماي، بىرنەشە ساعات جول ءجۇرىپ كەلگەن، دەپ جازادى qazaqstan.tv.
"بىرىنشىدەن مەن قازاقپىن. سوندىقتان مۇنداي باس قوسۋلاردان قالماۋعا تىرىسام. وسىنداي ساتتەردە جاڭا دوستار تاباسىڭ. ونىڭ ۇستىنە ءبىز قۇرعان بىرلەستىك ۇلعايعانىن قالايمىن. ول ءۇشىن مۇنداي جيىندار اسا ماڭىزدى”، - دەيدى ارمان اكىشيەۆ.
ارمان پراۆولاردىڭ تۋماسى. وسىدان جيىرما جىل بۇرىن امەريكالىق وتباسى اسىراپ العان. دەسە دە شىققان تەگىن بىلۋگە دەگەن ۇمتىلىسى ارقاسىندا ءۇش جىل بۇرىن تۋعان اكە شەشەسىن تابادى. ءتىپتى قازاقستانعا بارىپ، تۋىستارىن كورىپ قايتقان. "مەنىڭ جولىم بولدى، ءبىر اي عانا ىزدەدىم دەيدى ءوزى. ال كوپ اسىراندى بالا جىلدار بويى ارمانىنا جەتە الماي ءجۇر.
"امەريكالىقتار جەتى مىڭداي بالا اسىراپ العانىن بىلەمىز. سولاردىڭ كوبى شىققان تەگىن بىلگىسى كەلەدى. سول سەبەپتى دە وسى بىرلەستىكتى قۇردىق. قازاق ەلىنە قالاي ۇشىپ بارۋعا بولادى. تۋعان اكە شەشەسىن، اعايىن تۋىستارىن قالاي ىزدەۋ كەرەك. وسى ماسەلەردە قول ۇشىن سوزامىز ءارى قازاقستان مادەنيەتىمەن ەتەنە تانىسۋىنا كومەكتەسەمىز"، - دەيدى اسىراندى بالالار بىرلەستىگىنىڭ جەتەكشىسى ارمان اكىشيەۆ.
بىرلەستىك قازاقستان ەلشىلىگىمەن قارىم قاتىناس ورناتىپ، الەۋمەتتىك جەلى ارقىلى بەلسەندى جۇمىس ىستەي باستادى. ناتيجەسى دە جامان ەمەس. ءبىر جىلدىڭ ىشىندە التى قازاق بالاسى تۋىستارىمەن قاۋىشقان. ازىرگە ونلاين كەزدەسۋ وتكىزەتىن ۇيىم مۇشەلەرى بولاشاقتا قاتارى مولايسا تۋعان جەرمەن بايلانىسىن كەڭەيتۋ ءۇشىن تۇراقتى قۇرىلتاي وتكىزىپ تۇرماق. ال 5 جاسىندا ەرىكسىز مۇحيت اسسا دا ارماننىڭ تۋعان جەرگە دەگەن ماحابباتى ەرەك. ءتىپتى، كولىگىنىڭ سىرتىنا دا، ىشىنە دە ەل بايراعىن قويىپ العان. بيىل جازدا قازاقستانعا ارنايى بارىپ، انا ءتىلىن ۇيرەنبەك نيەتتە.
