Áleýmettik jelilerde «AQSh Senaty Donald Tramptyń áskeri ókilettigin shektedi» degen mazmunda jazbalar tarady. Avtorlar bul sheshim «oiyn erejesin ózgertedi», al naryqtar jańa rejimge ótedi dep paiymdaidy, dep habarlaidy Dalanews.kz.
Biraq shyn máninde ne bolyp jatyr?
Posttarda AQSh-tyń birneshe qalasyndaǵy jappai sherýlerdiń kadrlary kórsetilip, Senat prezidenttiń Kongrestiń kelisiminsiz áskeri áreket jasaý múmkindigin shektegeni aitylady. Alaida naqty qandai zań nemese qarar qabyldanǵany, onyń qashan kúshine engeni týraly naqty derek keltirilmeidi.
AQSh-ta prezidenttiń áskeri ókilettigi Konstitýtsiiamen jáne arnaiy zańdarmen retteledi. Mundai ózgerister bir ǵana saiasi málimdememen emes, kúrdeli zańnamalyq rásim arqyly qabyldanady: qujatty Kongress maquldap, prezident qol qoiýy nemese veto eńserilýi qajet.
Sarapshylardyń aitýynsha, geosaiasi taqyryptardy paidalanyp, emotsiialyq fon jasaý – áleýmettik jelidegi aýditoriiany tartýdyń keń taraǵan tásili. Ásirese sońynda «investitsiialyq komiýnitiǵa qosylyńyz», «bot arqyly signal alyńyz» degen shaqyrýlar bolsa, mundai kontenttiń marketingtik sipaty aiqyn kórinedi.
Naryqtar rasynda geosaiasi jańalyqtarǵa sezimtal. Biraq kez kelgen aqparatty investitsiialyq sheshimge negiz etpes buryn onyń derekkózi men quqyqtyq saldaryn naqty tekserý mańyzdy.
Aqparat aǵyny kúsheigen zamanda eń bastysy – emotsiiaǵa emes, faktige súiený.
