Almaty turǵyndary “Aqsai nannyń” aq kirpishi dúken sórelerinen ýaqytsha joǵalǵanyn málimdedi. Kásiporyn muny óndiristik jeliniń jóndelip jatqanymen túsindirgen. Alaida áleýmettik jelide zaýyt qytailyq investorlardyń qolyna ótýi múmkin degen sybys tarady, dep habarlaidy dalanews.kz.
Bul máseleni Facebook qoldanýshysy Aleksei Alekseev kóterdi. Onyń aitýynsha, kombinat eki aptadan beri aq kirpish nanyn shyǵarmai otyr. Sondai-aq áleýmettik jelide zaýytqa qytailyq kásipkerler qyzyǵýshylyq tanytyp júr degen aqparat taraǵan.
“Bul – Almatydaǵy eń tanymal ári dámdi nannyń biri. Resmi sebep – jabdyqtyń isten shyǵýy. Alaida másele munda emes, zaýytqa qytailyqtar qyzyǵýshylyq tanytyp jatyr degen sybys bar”, - dep jazdy ol.
Ol kásiporynnyń jeke menshikte bolýyna qatysty suraq ta qoidy.
“Áleýmettik mańyzy bar mundai nysan qalai jeke menshikke ótip ketken? Endi halyq tutynatyn nannyń óndirisi kásiporyn ieleriniń qalaýyna qarai toqtai bere me?” – deidi Aleksei Alekseev.
Jazbaǵa jaýap bergen “Aqsai nan” ókilderi qalypty nan óndirisiniń ýaqytsha toqtaǵanyn rastaǵan. Kompaniianyń málimetinshe, qazirgi ýaqytta osy ónimdi shyǵaratyn jeli jóndelip jatyr.
“Qazirgi ýaqytta qalypty nan óndiretin jelide jóndeý jumystary júrgizilýde. Jaqyn arada óndiris pen ónim jetkizýdi qaita bastaýdy josparlap otyrmyz”, – dep habarlady kásiporyn.
Alaida kompaniia jóndeýdiń qashan aiaqtalatynyn jáne nannyń dúkenderge naqty qai kúni qaita jetkiziletinin aitpady.
Qytailyqtar zaýytqa ne úshin qyzyǵýshylyq tanytqan?
Ashyq derekterden qytailyq investorlardyń “Aqsai nan” kombinatyn satyp alýǵa nemese kásiporynnyń menshik úlesine kirýge nietti ekeni týraly resmi aqparat tabylmady.
Qytaiǵa qatysty áńgimeniń shyǵýyna kompaniianyń eksporttyq jospary sebep bolýy múmkin. 2025 jylǵy jeltoqsanda “Aqsai nan” kombinatynyń bas tehnologi Gúlzat Jolmyrzaeva “MK-Kazahstan” basylymyna bergen suhbatynda kásiporynnyń Qytai naryǵyna shyǵý múmkindigin qarastyryp otyrǵanyn aitqan.
Onyń sózinshe, kombinat ókilderi Qytaidyń Hainan provintsiiasynda ótken 28-shi halyqaralyq qysqy aýyl sharýashylyǵy ónimderi kórmesine qatysqan. Kórme barysynda Qytai ókilderi qazaqstandyq kásiporynnyń ónimderine, ásirese keptirilgen nan ónimderi men “Shoko-sýshkige” qyzyǵýshylyq tanytqan.
“Birneshe ókil bizdiń ónimderimizge qyzyǵýshylyq tanytty. Qazir kelissózder júrgizilip jatyr”, – degen Gúlzat Jolmyrzaeva atalǵan basylymǵa bergen suhbatynda.
Bas tehnolog Qytaidy kásiporyn úshin qyzyqty, biraq ózindik ereksheligi bar naryq dep sipattaǵan. Onyń aitýynsha, eki el tutynýshylarynyń nan ónimderine qatysty talǵamy ártúrli. Máselen, Qytaida shaǵyn ári jeke qaptalǵan nan ónimderine suranys joǵary.
Kombinat kimge tiesili?
Ashyq reestrdegi málimet boiynsha, “Aqsai” nan-toqash kombinaty – jeke menshiktegi, jumys istep turǵan iri kásiporyn. Kompaniia 1997 jylǵy 14 naýryzda tirkelgen. Onyń basshysy retinde Zarina Sársenova kórsetilgen.
Kásiporynnyń negizgi qyzmeti – nan-toqash jáne uzaq saqtalmaityn unnan jasalǵan konditerlik ónimder óndirý. Ashyq derektegi málimet boiynsha, kombinatta shamamen myń adam jumys isteidi.
“Aqsai nan” jeke kásiporyn bolǵanymen, onyń birinshi surypty bidai unynan jasalǵan qalypty nany áleýmettik mańyzy bar azyq-túlik ónimderiniń qataryna kiredi.
Buǵan deiin Almaty ákimdigi nan baǵasyn turaqtandyrý maqsatynda kásiporynǵa jeńildetilgen qarjy bergen. Ákimdiktiń resmi habarlamasynda “Aqsai nannyń” birinshi surypty unnan jasalǵan qalypty nannyń bosatý baǵasyn bekitkeni kórsetilgen.
Alaida áleýmettik mańyzy bar ónim shyǵarǵany kásiporynnyń ózin avtomatty túrde memlekettik nemese strategiialyq nysanǵa ainaldyrmaidy. “Aqsai nan” – áleýmettik mańyzy bar azyq-túlik óndiretin jeke kásiporyn.
Qandai aqparat rastaldy?
Qazirgi ýaqytta aq kirpish nannyń óndiristik jelidegi jóndeý jumystaryna bailanysty ýaqytsha shyǵarylmai otyrǵany resmi túrde rastalǵan. Kompaniia óndiris pen ónim jetkizýdi jaqyn arada qaita bastaýǵa ýáde berdi.
Al kásiporyndy qytailyq investorlarǵa satý nemese zaýyt jumysyn osyǵan bailanysty toqtatý týraly aqparatqa dálel tabylǵan joq. Ashyq derekterde Qytai tarapymen júrgizilip jatqan kelissózderdiń “Aqsai nan” ónimderin eksporttaýǵa qatysty ekeni ǵana aitylǵan.
