Mańǵystaý oblysynda jeltoqsan aiynyń sońynan beri aqqýlardyń jappai qyrylýynan soń Aqtaýdaǵy Rixos qonaqúiinen Qarakólge qaldyq sý jiberip otyrǵan qubyr júiesi jumysyn birjola toqtatty. Bul týraly óńirdiń ekologiia departamenti málimdedi, dep habarlaidy Dalanews.kz.
Departament mamandarynyń shýly oqiǵadan soń bastaǵan tekserý jumystarynyń nátijesinde «Aktau Tourism Ltd» tarapynan tabiǵatty qorǵaý zańnamasyn buzýǵa qatysty derekter anyqtalǵan.
“Qańtar aiynyń basynda departamentke Rixos qonaqúiine qatysty "Tabgi orta" qaýymdastyǵynan ótinish tústi. Osydan keiin QR ÁQBtK-niń 331-babynyń 2-bóligi “Atmosferalyq aýany qorǵaý jáne sý obektilerin lastanýdan jáne bitelýden qorǵaý jónindegi talaptardy buzý” 328-babynyń 1-bóligimen ákimshilik ister qozǵaldy. Anyqtalǵan zań buzýshylyqtardy joiý jáne lastaýshy zattardyń ruqsat etilgen normalaryna sáikes tazartý dárejesine jetkenge deiin nemese qalanyń káriz jelilerine sarqyndy sýlardy aǵyzǵanǵa deiin Qarakól kóline aǵyndy sýlardy jiberýdi toqtatý týraly uiǵarym shyǵaryldy”, - dep jazylǵan departament málimetinde.
Sondai-aq, daýǵa qalǵan qonaqúi basshylyǵy da ózderine tiisti jumystardy atqarǵanyn habarlady.
“Qazirgi ýaqytta qonaq úi qalalyq ortalyq káriz júiesine tolyq qosyldy. Osyǵan bailanysty qorshaǵan ortaǵa qandai da bir antropogendik áser joq. Qosymsha Qarakól kóline qaldyq sý aǵatyn qubyrdy alý jumystary oryndaldy”, - dep pikir bildirdi qonaqúi ákimshiligi.
Buǵan deiin Mańǵystaý oblysyndaǵy Qarakól aýmaǵyn qystaǵan aqqýlardyń jappai qyrylǵany belgili boldy. Keiin olardyń sany arta tústi.
Osyǵan qatysty aqqýlardyń qyrylýyna bailanysty qustar qonatyn Qarakólge “Rixos” qonaqúiinen tógiletin qaldyq sýdyń quramyna taldaý jasalǵan bolatyn.
