Aqmola oblysynda sý tasqynyna jol bergen Sergeev aýyldyq okrýginiń ákimi sottaldy, dep habarlaıdy Dalanews.kz.
Atbasar aýdandyq soty Sergeev aýyldyq okrýginiń ákimi Q.-ǵa qatysty Qylmystyq kodekstiń 371-baby 2-bóligi boıynsha (qyzmetine salǵyrt qaraý) qylmystyq isti qarady. İs materıaldaryna sáıkes, ákim óz mindetterine nemquraıly qarap, nusqaýlyqtar men tapsyrmalardy oryndamaǵan. Sonyń saldarynan bóget jarylyp, Samarka aýylynda 19 úıdi sý basty. Tasqynnan zardap shekken turǵyndarǵa jergilikti búdjet esebinen 8 mıllıon teńge kóleminde ótemaqy tólenip, memleketke aıtarlyqtaı zıan keltirilgen.
Tergeý barysynda belgili bolǵandaı, ákim Esil baseındik ınspeksıasy men tótenshe jaǵdaılardyń aldyn alý jáne joıý jónindegi komısıanyń sý ótkizgish gıdrotehnıkalyq qurylysty tranzıttik rejımge kóshirý týraly tapsyrmalaryn oryndamaǵan. Bógettegi sýdyń deńgeıi kóterilip, qysym kúsheıgennen keıin aǵyndar paıda bolyp, eldimekendi sý basqan.
Sot sheshim shyǵarǵan kezde, aıyptalýshynyń kámeletke tolmaǵan balalary baryn jáne onyń qylmysty alǵash ret, abaısyzda jasaǵanyn jeńildetetin jaǵdaı retinde esepke aldy. Úkimge sáıkes, ákim memlekettik qyzmette laýazymdy qyzmetter atqarý quqyǵynan aıyrylyp, probasıalyq baqylaýmen 1 jyl 6 aıǵa bas bostandyǵyn shekteý jazasyna kesildi. Al materıaldyq shyǵynǵa baılanysty azamattyq talap azamattyq is júrgizý tártibimen qaralatyn boldy.
