اقمولا وبلىسىندا سۋ تاسقىنىنا جول بەرگەن سەرگەيەۆ اۋىلدىق وكرۋگىنىڭ اكىمى سوتتالدى، دەپ حابارلايدى Dalanews.kz.
اتباسار اۋداندىق سوتى سەرگەيەۆ اۋىلدىق وكرۋگىنىڭ اكىمى ق.-عا قاتىستى قىلمىستىق كودەكستىڭ 371-بابى 2-بولىگى بويىنشا (قىزمەتىنە سالعىرت قاراۋ) قىلمىستىق ءىستى قارادى. ءىس ماتەريالدارىنا سايكەس، اكىم ءوز مىندەتتەرىنە نەمقۇرايلى قاراپ، نۇسقاۋلىقتار مەن تاپسىرمالاردى ورىنداماعان. سونىڭ سالدارىنان بوگەت جارىلىپ، ساماركا اۋىلىندا 19 ءۇيدى سۋ باستى. تاسقىننان زارداپ شەككەن تۇرعىندارعا جەرگىلىكتى بيۋدجەت ەسەبىنەن 8 ميلليون تەڭگە كولەمىندە وتەماقى تولەنىپ، مەملەكەتكە ايتارلىقتاي زيان كەلتىرىلگەن.
تەرگەۋ بارىسىندا بەلگىلى بولعانداي، اكىم ەسىل باسسەيندىك ينسپەكسياسى مەن توتەنشە جاعدايلاردىڭ الدىن الۋ جانە جويۋ جونىندەگى كوميسسيانىڭ سۋ وتكىزگىش گيدروتەحنيكالىق قۇرىلىستى ترانزيتتىك رەجيمگە كوشىرۋ تۋرالى تاپسىرمالارىن ورىنداماعان. بوگەتتەگى سۋدىڭ دەڭگەيى كوتەرىلىپ، قىسىم كۇشەيگەننەن كەيىن اعىندار پايدا بولىپ، ەلدىمەكەندى سۋ باسقان.
سوت شەشىم شىعارعان كەزدە، ايىپتالۋشىنىڭ كامەلەتكە تولماعان بالالارى بارىن جانە ونىڭ قىلمىستى العاش رەت، ابايسىزدا جاساعانىن جەڭىلدەتەتىن جاعداي رەتىندە ەسەپكە الدى. ۇكىمگە سايكەس، اكىم مەملەكەتتىك قىزمەتتە لاۋازىمدى قىزمەتتەر اتقارۋ قۇقىعىنان ايىرىلىپ، پروباسيالىق باقىلاۋمەن 1 جىل 6 ايعا باس بوستاندىعىن شەكتەۋ جازاسىنا كەسىلدى. ال ماتەريالدىق شىعىنعا بايلانىستى ازاماتتىق تالاپ ازاماتتىق ءىس جۇرگىزۋ تارتىبىمەن قارالاتىن بولدى.
