Aqmola oblysynda “Rodina” agrofirmasynyń qyzmetkeri áriptesin abaisyzda kólikpen qaǵyp, saldarynan er adam qaza tapty. Sot marqumnyń otbasyna moraldyq ótemaqy retinde kásiporynnan 500 myń teńge óndirý týraly sheshim shyǵardy. Bul týraly belgili jýrnalist Mihail Kozachkov málimdedi, dep habarlaidy Dalanews.kz.
Qaiǵyly oqiǵa byltyr qyrkúiekte Tselinograd aýdanyndaǵy “Rodina” sovhozynyń óndiristik aýmaǵynda bolǵan. Sol kúni ÝAZ kóligin sút-taýar kesheniniń basshysy Andrei Shtainpreis tizgindegen.
“Onyń túsindirýinshe, kólikti artqa aidap kele jatqan kezde jaiaý júrginshini baiqamai qalǵan. Al jábirlenýshi de kólikke arqasymen turǵandyqtan qaýip tóngenin ańǵarmaǵan”, - deidi jýrnalist.
Oqiǵa saldarynan kásiporyn qyzmetkeri Qadybrashid Sádýaqasov aýyr jaraqat alyp, aýrýhanaǵa jetpei kóz jumǵan.
“Jol apatyna kináli azamat sotqa tartylǵanymen, jábirlenýshi tarappen tatýlasýyna bailanysty 2,5 jylǵa shartty túrde sottalǵan”, - deidi Kohachkov.
Marqumnyń týystary kásiporynnan 20 million teńge moraldyq ótemaqy talap etip, sotqa júgingen. Olar apat jumys ornynda bolǵanyn jáne kólik kompaniiaǵa tiesili ekenin alǵa tartqan.
Alaida sot barysynda kásiporyn ókilderi marqumdy jerleýge 1 million teńgeden astam qarajat bólgenin, qyzynyń oqýyna 3 million teńge tólegenin, sondai-aq saqtandyrý tólemderi qarastyrylǵanyn málimdegen.
Osyny eskergen sot talap aryz somasyn azaityp, moraldyq ótemaqyny 500 myń teńge kóleminde bekitti.
Aita keteiik, "Rodina" agrofirmasy iri ári tabysty kásiporyndardyń biri sanalady. Kompaniianyń jyldyq tabysy milliardtaǵan teńgemen esepteledi. Buǵan deiin kásiporyn basshylyǵy fýtbol klýbyna demeýshilik jasap, ár gol úshin 1 million teńge syiaqy berýge daiyn ekenin málimdegen bolatyn.
