اقمولا وبلىسىندا “رودينا” اگروفيرماسىنىڭ قىزمەتكەرى ارىپتەسىن ابايسىزدا كولىكپەن قاعىپ، سالدارىنان ەر ادام قازا تاپتى. سوت مارقۇمنىڭ وتباسىنا مورالدىق وتەماقى رەتىندە كاسىپورىننان 500 مىڭ تەڭگە ءوندىرۋ تۋرالى شەشىم شىعاردى. بۇل تۋرالى بەلگىلى جۋرناليست ميحايل كوزاچكوۆ مالىمدەدى، دەپ حابارلايدى Dalanews.kz.
قايعىلى وقيعا بىلتىر قىركۇيەكتە سەلينوگراد اۋدانىنداعى “رودينا” سوۆحوزىنىڭ وندىرىستىك اۋماعىندا بولعان. سول كۇنى ۋاز كولىگىن ءسۇت-تاۋار كەشەنىنىڭ باسشىسى اندرەي شتاينپرەيس تىزگىندەگەن.
“ونىڭ تۇسىندىرۋىنشە، كولىكتى ارتقا ايداپ كەلە جاتقان كەزدە جاياۋ جۇرگىنشىنى بايقاماي قالعان. ال جابىرلەنۋشى دە كولىككە ارقاسىمەن تۇرعاندىقتان ءقاۋىپ تونگەنىن اڭعارماعان”، - دەيدى جۋرناليست.
وقيعا سالدارىنان كاسىپورىن قىزمەتكەرى قادىبراشيد ءسادۋاقاسوۆ اۋىر جاراقات الىپ، اۋرۋحاناعا جەتپەي كوز جۇمعان.
“جول اپاتىنا كىنالى ازامات سوتقا تارتىلعانىمەن، جابىرلەنۋشى تاراپپەن تاتۋلاسۋىنا بايلانىستى 2،5 جىلعا شارتتى تۇردە سوتتالعان”، - دەيدى كوحاچكوۆ.
مارقۇمنىڭ تۋىستارى كاسىپورىننان 20 ميلليون تەڭگە مورالدىق وتەماقى تالاپ ەتىپ، سوتقا جۇگىنگەن. ولار اپات جۇمىس ورنىندا بولعانىن جانە كولىك كومپانياعا تيەسىلى ەكەنىن العا تارتقان.
الايدا سوت بارىسىندا كاسىپورىن وكىلدەرى مارقۇمدى جەرلەۋگە 1 ميلليون تەڭگەدەن استام قاراجات بولگەنىن، قىزىنىڭ وقۋىنا 3 ميلليون تەڭگە تولەگەنىن، سونداي-اق ساقتاندىرۋ تولەمدەرى قاراستىرىلعانىن مالىمدەگەن.
وسىنى ەسكەرگەن سوت تالاپ ارىز سوماسىن ازايتىپ، مورالدىق وتەماقىنى 500 مىڭ تەڭگە كولەمىندە بەكىتتى.
ايتا كەتەيىك، "رودينا" اگروفيرماسى ءىرى ءارى تابىستى كاسىپورىنداردىڭ ءبىرى سانالادى. كومپانيانىڭ جىلدىق تابىسى ميللياردتاعان تەڭگەمەن ەسەپتەلەدى. بۇعان دەيىن كاسىپورىن باسشىلىعى فۋتبول كلۋبىنا دەمەۋشىلىك جاساپ، ءار گول ءۇشىن 1 ميلليون تەڭگە سىياقى بەرۋگە دايىن ەكەنىن مالىمدەگەن بولاتىن.
