Aqmola oblysynda Astrahan aýdany máslihatynyń tóraǵasy Meiram Qojahmetovtińotbasyna qaraqshylyq shabýyl jasaldy. 2025 jyly 15 shildege qaraǵan túni qarýly eki adam sheneýniktiń úiine basa-kóktep kirip, otbasy múshelerin tutqynǵa alyp, úiindegi qundy zattaryn tonap ketken, dep habarlaidy Dalanews.kz.
Bul aqparat áleýmettik jelide tarady.
Boljam boiynsha, betperde kigen eki adam qarý ustap, Qojahmetovtiń jekemenshik úiine kirip kelgen. Qaskóiler úi iesi men onyń týystaryn jertólege qamap, bólmelerdi tintip shyqqan. Olar aqsha, zergerlik buiymdar men kólikti alyp, oqiǵa ornynan izderin sýytqan.
Aqmola oblystyq politsiia departamentiniń baspasóz qyzmeti bul derekti rastady. Vedomstvo málimetinshe, Astrahan aýylynda jasalǵan qaraqshylyq shabýyl boiynsha qylmystyq is qozǵalǵan.
“Qazirgi ýaqytta kúdiktilerdiń jeke basyn anyqtaý jáne olardy ustaý boiynsha jedel-izdestirý sharalary júrgizilýde. Bul qylmysty ashý máselesi departament basshylyǵynyń erekshe baqylaýynda”, — delingen politsiia taratqan resmi habarlamada.
Aita keteiik, mundai jaǵdai biyl alǵash ret tirkelip otyrǵan joq. Buǵan deiin 2025 jyly 21 sáýirde Shymkent qalasy ákiminiń orynbasary Rýslan Berdenovke de qarýly shabýyl jasalǵan edi. Oǵan birneshe márte oq atylyp, aýyr jaraqatpen aýrýhanaǵa jetkizildi. Sheneýnikke sol kúni shuǵyl ota jasaldy.
