Aqmola oblysynda eki oqýshy júk poiyzyna minip, vagonnan vagonǵa sekirgen. Qaýipti áreket olardyń ómirine qaýip tóndirdi, dep habarlaidy Dalanews.kz.
Oqiǵa 11 sáýirde Tselinograd aýdanyndaǵy Jainaq stantsiiasynda, Astana-Atbasar baǵytynda bolǵan. Kóliktegi politsiia departamentiniń málimetinshe, mashinist vagonda bógde adamdardy baiqap, poiyzdy shuǵyl toqtatýǵa májbúr bolǵan.
Jaǵdai qaýipti ekenin túsingen ol dereý stantsiia kezekshisine jáne kóliktegi politsiiaǵa habar bergen. Oqiǵa ornyna kelgen qyzmetkerler 14 jáne 16 jastaǵy eki jasóspirimdi anyqtady.
Politseiler jasóspirimderdi poiyzdan túsirmek bolǵan kezde qashýǵa tyrysqan olardyń biri tómenge qulap, buǵanasyn syndyrǵan. Ekinshisi aiaǵyn soǵyp alǵan. Zardap shekken jasóspirim aýrýhanaǵa jetkizildi, al ekinshisi ata-anasyna tapsyryldy.
Qazir olardyń poiyz ústine qalai shyqqany jáne sol sátte poiyz qozǵalysta bolǵan-bolmaǵany anyqtalyp jatyr.
Jasóspirimderdiń ata-analary balalardyń qaýipsizdigin qamtamasyz etpegeni jáne temirjoldaǵy tártipti buzǵany úshin ákimshilik jaýapkershilikke tartyldy.
