Aqmola oblysynda adamdardy urlaýmen ainalysqan qylmystyq toptyń isi boiynsha bankirler men Qarjy naryǵyn retteý jáne damytý agenttiginiń (QNRDA) qyzmetkeri ustaldy. Bul týraly oblystyq prokýratýranyń baspasóz qyzmeti málimdedi, dep habarlaidy Dalanews.kz.
"Aqmola oblysynyń prokýrorlary áleýmettik turǵydan osal azamattardy urlap, olardyń atyna iri kólemde banktik nesie rásimdegen uiymdasqan qylmystyq topqa (UQT) qatysty tergeýdi aiaqtady. Top quramyna eldiń túrli óńirlerinen kelgen 25 adam kirgen", – delingen seisenbi kúni taratylǵan habarlamada.
Qadaǵalaý organynyń málimetinshe, ustalǵandardyń arasynda QNRDA ortalyq apparatynyń qyzmetkeri men birqatar bankterdiń ókilderi bar.
"Olardyń qatysýymen bes jyldan astam ýaqyt boiy alaiaqtyq áreketter jasalǵan", – delingen habarlamada.
Tergeý derekterine sáikes, qylmystardyń qurbany bolǵan – 348 qazaqstandyq. Keltirilgen jalpy shyǵyn kólemi 3,7 mlrd teńgeni quraǵan. Tárkileý barysynda qylmystyq jolmen alynǵan múlikter anyqtaldy: Almaty qalasyndaǵy páterler men jer telimderi, qymbat avtokólikter jáne iri kólemdegi qolma-qol aqsha. Tárkilengenniń jalpy quny 2,7 mlrd teńgege baǵalanýda.
Barlyq qatysýshy ustalyp, ýaqytsha ustaý izoliatoryna qamaldy. Qazir qylmystyq is protsess qatysýshylarynyń tanysýyna berilip, sońǵy sheshimdi sot shyǵaratyn bolady.
