اقمولا وبلىسىندا ادامداردى ۇرلاۋمەن اينالىسقان قىلمىستىق توپتىڭ ءىسى بويىنشا بانكيرلەر مەن قارجى نارىعىن رەتتەۋ جانە دامىتۋ اگەنتتىگىنىڭ (قنردا) قىزمەتكەرى ۇستالدى. بۇل تۋرالى وبلىستىق پروكۋراتۋرانىڭ باسپا ءسوز قىزمەتى مالىمدەدى، دەپ حابارلايدى Dalanews.kz.
"اقمولا وبلىسىنىڭ پروكۋرورلارى الەۋمەتتىك تۇرعىدان وسال ازاماتتاردى ۇرلاپ، ولاردىڭ اتىنا ءىرى كولەمدە بانكتىك نەسيە راسىمدەگەن ۇيىمداسقان قىلمىستىق توپقا (ۇقت) قاتىستى تەرگەۋدى اياقتادى. توپ قۇرامىنا ەلدىڭ ءتۇرلى وڭىرلەرىنەن كەلگەن 25 ادام كىرگەن"، – دەلىنگەن سەيسەنبى كۇنى تاراتىلعان حابارلامادا.
قاداعالاۋ ورگانىنىڭ مالىمەتىنشە، ۇستالعانداردىڭ اراسىندا قنردا ورتالىق اپپاراتىنىڭ قىزمەتكەرى مەن ءبىرقاتار بانكتەردىڭ وكىلدەرى بار.
"ولاردىڭ قاتىسۋىمەن بەس جىلدان استام ۋاقىت بويى الاياقتىق ارەكەتتەر جاسالعان"، – دەلىنگەن حابارلامادا.
تەرگەۋ دەرەكتەرىنە سايكەس، قىلمىستاردىڭ قۇربانى بولعان – 348 قازاقستاندىق. كەلتىرىلگەن جالپى شىعىن كولەمى 3،7 ملرد تەڭگەنى قۇراعان. تاركىلەۋ بارىسىندا قىلمىستىق جولمەن الىنعان مۇلىكتەر انىقتالدى: الماتى قالاسىنداعى پاتەرلەر مەن جەر تەلىمدەرى، قىمبات اۆتوكولىكتەر جانە ءىرى كولەمدەگى قولما-قول اقشا. تاركىلەنگەننىڭ جالپى قۇنى 2،7 ملرد تەڭگەگە باعالانۋدا.
بارلىق قاتىسۋشى ۇستالىپ، ۋاقىتشا ۇستاۋ يزولياتورىنا قامالدى. ءقازىر قىلمىستىق ءىس پروسەسس قاتىسۋشىلارىنىڭ تانىسۋىنا بەرىلىپ، سوڭعى شەشىمدى سوت شىعاراتىن بولادى.
