Búgin QR Densaýlyq saqtaý ministri Aqmaral Álnazarova, Parlament Májilisiniń depýtattary Marhabat Jaiymbetov, Murat Ergeshbaev, oblys ákiminiń birinshi orynbasary Daniiar Janalinov «Qamqorlyq» erte aralasý ortalyǵynyń jáne juqpaly aýrýlar aýrýhanasynyń jumysymen tanysty, dep habarlaidy Dalanews.kz
Aimaqta jyl saiyn shamamen 20 myń náreste dúniege keledi, al 18 jasqa deiingi balalar sany 322 myńǵa jetedi. Balalardy ońaltý qyzmetiniń qoljetimdiligin arttyrý maqsatynda 2022 jyly «Qamqorlyq» ortalyǵy ashylǵan bolatyn. Oǵan jergilikti biýdjetten 205,6 mln teńge bólindi, al «Samuryq-Qazyna» AQ jáne «Qamqorlyq» qorynan qaralǵan 103,4 mln teńgege qural-jabdyqtar alynyp, mamandar biliktiligin arttyrdy.
Ortalyq ashylǵan tórt jyl ishinde 6 000-ǵa jýyq bala ońaltý qyzmetin aldy. Qozǵalý, sóileý daǵdylaryn damytyp, áleýmettik beiimdelýdiń mańyzdy kezeńderin sátti aiaqtady. Munda balalarǵa meditsinalyq jáne pedagogikalyq kómek kórsetiledi. Atap aitqanda, meditsinalyq ońaltý, emdik dene shynyqtyrý, fizioterapiia, logopediialyq jáne defektologiialyq qoldaý, sondai-aq eńbek terapiiasy.
Oblystyq juqpaly aýrýlar aýrýhanasy 2024 jyly keshendi kúrdeli jóndeýden ótip, ótken jyldyń sońynda tolyqtai paidalanýǵa berildi. Kúrdeli jóndeýge jergilikti biýdjetten 1,6 mlrd teńge qaraldy. Búginde jańartylǵan bólimsheler patsientter men meditsina qyzmetkerleriniń joǵary baǵasyn alýda. Sońǵy úsh jylda aýrýhananyń materialdyq-tehnikalyq bazasyn nyǵaitýǵa 590 840 153 teńge qarjy bólingen, 49 mln teńgege 2 avtokólik satyp alyndy.
Ótken jyly klinikalyq farmakologiia jáne gospitaldyq farmatsiia bólimshesi ashylyp, zamanaýi qural-jabdyqtarmen qamtamasyz etildi. Aldaǵy ýaqytta fizioterapiialyq emdeý bólimshesin iske qosý jáne meditsina qyzmetkerleriniń shetelde biliktiligin arttyrý josparlanǵan.
