Qazaq tiliniń shoý-biznestegi jeńisi
Prezidenttiń bul sózdi aitýyna ne túrtki boldy? Memleket basshysy aitar sózin árqashan saraptap, qoǵamdyq ortaǵa qalai áser etetinin boljap, bilgennen keiin ǵana aitatyny anyq. Bizder osy másele tóńireginde oiymyzdy ortaǵa salǵandy jón sanadyq.
Qazir kún ótken saiyn qazaq tili kúsh alyp keledi. Qazaq tili mádeniet pen shoý-biznesti tolyqtai jaýalap aldy. Qazir telearna bitkenniń biri qazaqtyń shoý-biznesindegi ósek-aiańdy kórsetip, bir-birimen jarysyp, reiting qýyp júrgeni barshaǵa málim.
Jetekshi telearnalardyń ózderi Qairat pen Tóreǵalidyń kontsertin baiaǵydai tún aýǵanda kórsetpeidi. Básekede baqtary janýy úshin tanymal ánshilerdiń kontsertterin praim-taim ýaqytqa qoiady. Muny bárimiz bilemiz. Bul Qazaqstanda orys tiliniń kúni ótip bara jatqanynyń aiqyn belgisi..
Áskerge qazaqtar ǵana barady
Sol siiaqty ásker, quqyq qorǵaý salasynda da qazaq tiliniń mereii ústem bolyp turǵanyn moiyndaǵan jón. Qazir qazaq tilin bilmeitin ózge ult ókilderiniń balalary áskerge múlde barmaidy.
Osydan eki-úsh jyl buryn aýdandyq áskeri kommisariatta isteitin tanysym, áskerge barýǵa ynta tanytqandardyń bári qazaq jigitteri ekenin, al ózge ult ókilderiniń jastary óte sirek ekenin aitqan edi. Sondyqtan sońǵy ýaqyttary ásker men quqyq qorǵaý salasynda qazaq tili ústemdik quryp keledi desek artyq aitqandyq bolmas edi.
Aitpaqshy, álgi tanysym áskerge barǵan ózge ult ókilderiniń balalary on jyl mektep qabyrǵasynda úirenbegin qazaq tilin bir jarym jyldyń ishinde ásker qatarynda júrip, turmystyq deńgeide meńgerip qaitatynyn da aitqany esimde.
Bizder táýelsizdik jyldary qazaq tiliniń qoldanys aiasyn keńeitý úshin arnaiy agenttik, komitet quryp, oǵan qyrýar qarjy jumsap, bilik basyndaǵylarǵa qazaq tilin úiretýge kúsh saldyq. Biraq osy jyldar ishinde qazaq tilin úiretýde «armiiadai» tiimdi jumys istegen mekemeni kórmedik.
Sondyqtan áskerdegi til syndyrýdyń tásilderin bizdiń til mamandary zerttese, artyq bolmas edi.
Nurlan Jumahan, jýrnalist, bloger.
https://dalanews.kz/34331
