قازاق ءتىلىنىڭ شوۋ-بيزنەستەگى جەڭىسى
پرەزيدەنتتىڭ بۇل ءسوزدى ايتۋىنا نە تۇرتكى بولدى؟ مەملەكەت باسشىسى ايتار ءسوزىن ءارقاشان ساراپتاپ، قوعامدىق ورتاعا قالاي اسەر ەتەتىنىن بولجاپ، بىلگەننەن كەيىن عانا ايتاتىنى انىق. بىزدەر وسى ماسەلە توڭىرەگىندە ويىمىزدى ورتاعا سالعاندى ءجون سانادىق.
ءقازىر كۇن وتكەن سايىن قازاق ءتىلى كۇش الىپ كەلەدى. قازاق ءتىلى مادەنيەت پەن شوۋ-بيزنەستى تولىقتاي جاۋالاپ الدى. ءقازىر تەلەارنا بىتكەننىڭ ءبىرى قازاقتىڭ شوۋ-بيزنەسىندەگى وسەك-اياڭدى كورسەتىپ، بىر-بىرىمەن جارىسىپ، رەيتينگ قۋىپ جۇرگەنى بارشاعا ءمالىم.
جەتەكشى تەلەارنالاردىڭ وزدەرى قايرات پەن تورەعاليدىڭ كونسەرتىن باياعىداي ءتۇن اۋعاندا كورسەتپەيدى. باسەكەدە باقتارى جانۋى ءۇشىن تانىمال انشىلەردىڭ كونسەرتتەرىن پرايم-تايم ۋاقىتقا قويادى. مۇنى ءبارىمىز بىلەمىز. بۇل قازاقستاندا ورىس ءتىلىنىڭ كۇنى ءوتىپ بارا جاتقانىنىڭ ايقىن بەلگىسى..
اسكەرگە قازاقتار عانا بارادى
سول سياقتى اسكەر، قۇقىق قورعاۋ سالاسىندا دا قازاق ءتىلىنىڭ مەرەيى ۇستەم بولىپ تۇرعانىن مويىنداعان ءجون. ءقازىر قازاق ءتىلىن بىلمەيتىن وزگە ۇلت وكىلدەرىنىڭ بالالارى اسكەرگە مۇلدە بارمايدى.
وسىدان ەكى-ۇش جىل بۇرىن اۋداندىق اسكەري كومميسارياتتا ىستەيتىن تانىسىم، اسكەرگە بارۋعا ىنتا تانىتقانداردىڭ ءبارى قازاق جىگىتتەرى ەكەنىن، ال وزگە ۇلت وكىلدەرىنىڭ جاستارى وتە سيرەك ەكەنىن ايتقان ەدى. سوندىقتان سوڭعى ۋاقىتتارى اسكەر مەن قۇقىق قورعاۋ سالاسىندا قازاق ءتىلى ۇستەمدىك قۇرىپ كەلەدى دەسەك ارتىق ايتقاندىق بولماس ەدى.
ايتپاقشى، الگى تانىسىم اسكەرگە بارعان وزگە ۇلت وكىلدەرىنىڭ بالالارى ون جىل مەكتەپ قابىرعاسىندا ۇيرەنبەگىن قازاق ءتىلىن ءبىر جارىم جىلدىڭ ىشىندە اسكەر قاتارىندا ءجۇرىپ، تۇرمىستىق دەڭگەيدە مەڭگەرىپ قايتاتىنىن دا ايتقانى ەسىمدە.
بىزدەر تاۋەلسىزدىك جىلدارى قازاق ءتىلىنىڭ قولدانىس اياسىن كەڭەيتۋ ءۇشىن ارنايى اگەنتتىك، كوميتەت قۇرىپ، وعان قىرۋار قارجى جۇمساپ، بيلىك باسىنداعىلارعا قازاق ءتىلىن ۇيرەتۋگە كۇش سالدىق. ءبىراق وسى جىلدار ىشىندە قازاق ءتىلىن ۇيرەتۋدە «ارمياداي» ءتيىمدى جۇمىس ىستەگەن مەكەمەنى كورمەدىك.
سوندىقتان اسكەردەگى ءتىل سىندىرۋدىڭ تاسىلدەرىن ءبىزدىڭ ءتىل ماماندارى زەرتتەسە، ارتىق بولماس ەدى.
ەگەر قاجەت بولسا، پارلامەنتتە قازاق تىلىندە قويىلعان سۇراقتىڭ ماعاناسىن تۇسىنبەي قازاقتاردى جەرگە قاراتقان ۇلتتىق بانك باسشىسى دانيار اقىشيەۆ سىندى جاس شەندىلەردى توپتاپ، «وتار» مەن «سارىشاعانداعى» اسكەري بولىمشەلەرگە جىبەرىپ، ءتىل سىندىرىپ الۋدى ۇسىنامىز. ءوز باسىم جاس شەندىلەرگە قازاق ءتىلىن ۇيرەتۋدىڭ بۇدان باسقا وڭتايلى جولىن كورىپ تۇرعان جوقپىن. ونىڭ ۇستىنە اسكەر ءتىلى سىندىرۋدىڭ ءتيىمدى جولى بولىپ تۇر.
نۇرلان جۇماحان، جۋرناليست، بلوگەر.
https://dalanews.kz/34331
